ދިވެހިރާއްޖޭގައި ބޭރު ފައިސާ މާރުކުރުމުގެ ވިޔަފާރި ކުރުމުގެ ހުއްދަ ދޫކޮށްފައިވާ 59 ފަރާތުގެ ލިސްޓު މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުކޮށް، އެ އޮތޯރިޓީގެ ލައިސަންސް ނެތި އެފަދަ މުއާމަލާތްތައް ކުރާ ފަރާތްތަކާއެކު މުއާމަލާތް ނުކުރުމަށް އިލްތިމާސްކޮށްފިއެވެ.
އެމްއެމްއޭ އިން ނެރުނު ނޫސް ބަޔާނެއްގައި ބުނީ، ރާއްޖޭގައި ބޭރު ފައިސާ މާރުކުރުމުގެ ވިޔަފާރި ކުރަންވާނީ އެ އޮތޯރިޓީން ދޫކުރާ ލައިސަންސެއް އޮވެގެން ކަމަށް ބަޔާންކޮށްފައިވީ ނަމަވެސް، ބައެއް ފަރާތްތަކުން ލައިސަންސް ނެތި ބޭރު ފައިސާ މާރުކުރުމުގެ މުއާމަލާތްތައް ކުރަމުންދާކަން ފާހަގަކުރެވިފައިވާ ކަމަށެވެ.
މިގޮތުން ޤާނޫނު ނަންބަރު 2024/32 (ބޭރު ފައިސާއާބެހޭ ޤާނޫނު) އަދި މަނީ ޗޭންޖިންގ ވިޔަފާރިއާބެހޭ ގަވާއިދުގައި، ބޭރު ފައިސާ މާރުކުރުމުގެ ވިޔަފާރި ކުރެވޭނީ އެމްއެމްއޭގެ ލައިސަންސް އޮވެގެންކަން ސާފުކޮށް ބަޔާންކޮށްފައިވާ ކަމަށް އެ މަރުކަޒީ ބޭންކުން ބުނެފައިވެއެވެ.
އެމްއެމްއޭގެ ލައިސަންސް ނެތި ބޭރު ފައިސާ މާރުކުރުމުގެ މުއާމަލާތްތައް ކުރުމަކީ ދިވެހިރާއްޖޭގެ ޤާނޫނުތަކުގެ ދަށުން ކުށެއް ކަމަށްވާތީ، އެއްވެސް ފަރާތަކުން އެފަދަ ލައިސަންސް ނެތް ފަރާތްތަކާއެކު ބޭރު ފައިސާ މާރުކުރުމުގެ މުއާމަލާތް ނުކުރުމަށް އެ އޮތޯރިޓީން ވަނީ އިލްތިމާސްކޮށްފައެވެ.
އެ އޮތޯރިޓީން ބުނި ގޮތުގައި، 09 ސެޕްޓެންބަރު 2026 ގެ ނިޔަލަށް ލައިސަންސް ދޫކުރެވިފައިވާ 59 ފަރާތުގެ މައުލޫމާތު މި ނޫސް ބަޔާނާއެކު ވަނީ އާންމުކުރެވިފައެވެ. އަދި ރާއްޖޭގައި ބޭރު ފައިސާ މާރުކުރުމުގެ ވިޔަފާރި ކުރުމުގެ ލައިސަންސް ދޫކޮށްފައިވާ ފަރާތްތަކުގެ އަދާހަމަ ލިސްޓު އެމްއެމްއޭގެ ވެބްސައިޓް www.mma.gov.mv އިން ފެންނަން ހުންނާނެ ކަމަށްވެސް ބުނެފައިވެއެވެ.
އެހެންކަމުން، އެއްވެސް ފަރާތަކުން ބޭރު ފައިސާ މާރުކުރުމުގެ މުއާމަލާތެއް ބޭންކެއް ފިޔަވައި އެހެން ފަރާތަކާއެކު ކުރާނަމަ، އެ މުއާމަލާތެއް ކުރެވެނީ ބޭރު ފައިސާ މާރުކުރުމުގެ ވިޔަފާރި ކުރުމުގެ ލައިސަންސް ލިބިފައިވާ ފަރާތަކާއެކުކަން ކަށަވަރުކުރުމަށް އެމްއެމްއޭއިން ވަނީ އެދިފައެވެ. އަދި އެފަދަ މުއާމަލާތްތައް ޤާނޫނުތަކާއި ގަވާއިދުތަކާ އެއްގޮތަށް ކުރުމަށްވެސް އެ އޮތޯރިޓީން ވަނީ އިލްތިމާސްކޮށްފައެވެ.
ކިޔުންތެރިންގެ ހިޔާލު