އިނގިރޭސި ޕްރިމިއާ ލީގުގައި މި ސީޒަނުގައި ލިވަޕޫލް ފުރަތަމަ ފަހަރަށް މޮޅުވެއްޖެއެވެ.
ރަށުން ބޭރުގައި އިޕްސްވިޗް ޓައުން އާއި ދެކޮޅަށް ކުޅުނު މި މެޗުން ލިވަޕޫލް 2-0 ގެ ނަތީޖާއަކުން މޮޅުވެފައިވާއިރު މި މެޗުގައި އެ ޓީމުން ޖެހި ދެ ލަނޑުވެސް އެ ޓީމަށް ކާމިޔާބުކޮށްދީފައިވަނީ އެލެކްޒެންޑަރ އިސާކްއެވެ. އިޕްސްވިޗްގެ ޕޯޓްމަން ރޯޑްގައި ތިރީސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ 6 ވަނަ މިނިޓުގައި އެލެކްޒެންޑަރ އިސާކް ވަނީ ލަނޑެއް ޖަހާ އެ ޓީމަށް ކުރި ހޯދަދީފައެވެ. އަދި އޭގެ ތިން މިނިޓު ފަހުން އޭނާ ވަނީ އިތުރު ލަނޑެއް ޖަހާ މެޗުގެ ނަތީޖާ 2-0 އަށް ބަދަލުކޮށްފައެވެ.
މި މެޗުގައި ލިވަޕޫލް އިން ޖެހި ދެ ލަނޑު އިސާކް ކާމިޔާބުކުރިއިރު މި ދެ ލަނޑުވެސް ޖަހަން ފުރުސަތު ތަނަވަސްކޮށްދީފައިވަނީ ކޯޑީ ގެކްޕޯއެވެ.
އިސާކް މި މެޗުގައި ދެ ލަނޑު ޖަހާފައިވާއިރު މިއީ މީގެ އަހަރެއްހާ ދުވަސް ކުރިން 125 މިލިއަން ޕައުންޑްގެ ފީއަކަށް ނިއުކާސަލް ޔުނައިޓެޑް އިން ލިވަޕޫލް އާއި އޭނާ ގުޅުނު ފަހުން އެއް މެޗެއްގައި ދެ ލަނޑު ޖެހި ފުރަތަމަ ފަހަރެވެ.
ލިވަޕޫލްގެ ކޯޗު ކަމާއި މި ސީޒަނުގައި އަލަށް ހަވާލުވި އެންޑޮނީ އިރައޯލާގެ އިރުޝާދުގެ ދަށުން ޕްރިމިއާ ލީގުގައި އެ ޓީމުން ތިން މެޗު ކުޅެފައިވާއިރު ފުރަތަމަ ކުޅުނު ދެ މެޗުވެސް ވަނީ އެއްވަރުވެފައެވެ. އަދި ލީގުގައި މިއީ އެ ކްލަބު މި ސީޒަނުގައި މޮޅުވި ފުރަތަމަ ފަހަރެވެ.
އިރައޯލާ ވަނީ މެޗުގެ 64 ވަނަ މިނިޓުގައި އެ ޓީމާއި އަލަށް ގުޅުނު ބްރެޑްލީ ބާކޯލާ ކުޅެން އަރުވާފައެވެ.
ފުރަތަަމަ މެޗުގައި އަމިއްލަ ދަނޑުގައި ލީގުގައި ސަންޑަލެންޑް އަތުން އިޕްސްވިޗް މޮޅުވިނަމަވެސް، އޭގެ ފަހުން ކުޅުނު ދެ މެޗުން މިވަނީ މެންޗެސްޓާ ޔުނައިޓެޑާއި ލިވަޕޫލް އަތުން ބަލިވެފައެވެ.
ކިޔުންތެރިންގެ ހިޔާލު