ގަތަރުގެ ބޮޑުވަޒީރު އަދި ޚާރިޖީ ވަޒީރު ޝައިޚް މުހައްމަދު ބިން އަބްދުއްރަހްމާން ބިން ޖާސިމް އައްޘާނީ ތެހެރާނަށް މިއަދު ވަޑައިގެން އީރާނު ސަރުކާރާއެކު މުހިންމު މަޝްވަރާތަކެއް ބާއްވައިފިއެވެ.
މިއީ، އީރާނާ ދެކޮޅަށް އެމެރިކާއިން އުދުވާނު ފެށިފަހުން ގަތަރުގެ ވެރިޔަކު އީރާނަށް ވަޑައިގެންނެވި ފުރަތަމަ ފަހަރެވެ.
ގަތަރުގެ ޚާރިޖީ ވަޒީރު ވަނީ އީރާނަށް ވަޑައިގެން އީރާނުގެ ޚާރިޖީ ވަޒީރު އައްބާސް އަރަޣްޗީއާ ބައްދަލު ކުރައްވައި މުހިންމު މައްސަލަތަކާ ގުޅޭގޮތުން މަޝްވަރާތައް ބާއްވާފައެވެ.
ދެ ގައުމުން މަޝްވަރާ ކުރެއްވި އެއް ކަމަކީ، ހޮރްމޫޒު ކަނޑުއޮޅީގައި އަޅާފައިވާ މައިންތައް ދެގައުމު ގުޅިގެން ސާފުކުރުމަށް އެކަށައަޅާފައިވާ ޕްރޮޖެކްޓް ތަންފީޒުކުރުމާ ގުޅޭގޮތުންނެވެ.
މީގެއިތުރުން، އުޅަނދުފަހަރު ހޮރްމޫޒު ހުރަސްކުރުމަށް ވަގުތީ ރޫޓެއް އުފެއްދުމަށް ހުށަހަޅާފައިވާ މަރުހަލާތަކެއްގެ އޮނިގަނޑަކާ ބެހޭގޮތުންވެސް ދެ ގައުމުން މަޝްވަރާ ކޮށްފައި ވެއެވެ.
އަދި ސަރަހައްދީ ކުރިމަތިލުންތައް ކުޑަކުރުމަށާއި މަޝްވަރާގެ މަގު އިޚްތިޔާރު ކުރުމަށް ކުރެވެމުންދާ މަސައްކަތްތައްވެސް ގަތަރާއި އީރާނުން މުރާޖައާ ކޮށްފައި ވެއެވެ.
އީރާނުގެ ޚާރިޖީ ވަޒީރު އައްބާސް އަރަޣްޗީވަނީ، މައްސަލަތައް ސުލްހަވެރިމަގުން ހައްލުކުރުމަށް ގަތަރު ސަރުކާރުން އަދާކުރާ މުހިންމު ދައުރަށް ޝުކުރު އަދާކުރައްވާފައެވެ.
ހަނގުރާމައިގެ ތެރޭގައި އީރާނުންވަނީ، ގަތަރުގެ ސަރަހައްދުތަކަށް ވައިގެ ހަމަލާތައްވެސް ދީފައެވެ. އެއީ، ގަތަރުގައި ގާއިމްކޮށްފައިވާ އެމެރިކާގެ އަސްކަރީ ބޭސްތަކަށާއި، އަސްކަރީ ތަންތަނަށެވެ.
އީރާނުގެ ހަމަލާތަކުގެ ސަބަބުން ދެގައުމުގެ ގުޅުން ގޯސްވެގެންދިޔައެވެ.
ކިޔުންތެރިންގެ ހިޔާލު