ގްރޭޓަރ މާލެ ސަރަހައްދުން ގޯއްޗާއި ފުލެޓްއަށް އެދި ހުށަހަޅާފައިވާ އެޕްލިކޭޝަންތަކުގެ ވެރިފިކޭޝަން ތެރެއިން މިނިސްޓްރީން ދީފައިވާ ނޯޓިސްގައިވާ މަޢުލޫމާތު ޞައްޙަ ނޫންކަމުގައިވާނަމަ އެކަމުގެ ތަފްޞީލާއި ކަމާގުޅުންހުރި ލިޔެކިޔުންތައް ހުށަހެޅުމަށް މިނިސްޓްރީން އެޕްލިކަންޓަށް ދޭ މުއްދަތު އިތުރުކޮށްފިއެވެ.
ސަރުކާރުގެ “ބޯހިޔާވަހިކަން އެންމެންނަށް” ސިޔާސަތުގެ ދަށުން ގްރޭޓަރ މާލެ ސަރަހައްދުން ގޯއްޗާއި ފުލެޓަށް އެދި އެޕްލިކޭޝަން ހުށަހަޅާފައިވާ ފަރާތްތަކުގެ ފޯމުތަކުގެ ވެރިފިކޭޝަން މަސައްކަތް މިނިސްޓްރީން ދަނީ ކުރަމުންނެވެ.
ކުރިން ލިޔެކިޔުންތައް ހުށަހެޅުމަށް ދީފައިވަނީ 7 ދުވަހުގެ މުއްދަތެކެވެ. ނަމަވެސް އެޕްލިކަންޓުންނަށް ލުއިފަސޭހަކޮށް ދިނުމުގެ ގޮތުން މި މުއްދަތު މިނިސްޓްރީން ވަނީ 21 ދުވަހަށް އިތުރުކޮށްފައެވެ.
މިނިސްޓްރީން ދީފައިވާ 21 ދުވަހުގެ މުއްދަތުގެ ތެރޭގައި ފާހަގަކޮށްފައިވާ މައްސަލައަށް ޖަވާބެއް ހުށަނާޅާނަމަ، އެ އެޕްލިކޭޝަން ޝަރުތު ހަމަނުވާ ނުވަތަ ހުށަހެޅި ލިޔެކިޔުން ފުރިހަމަނުވާ އެޕްލިކޭޝަނެއްގެ ގޮތުގައި ބަލައިގަންނާނެއެވެ.
މީގެ އިތުރުން ބޯހިޔާވަހިކަން އެންމެންނަށް ސިޔާސަތުގެ ދަށުން ހިންގާ ޕްރޮގްރާމްތަކާ ގުޅޭ މަޢުލޫމާތު ދިނުމަށް މިނިސްޓްރީގައި ހެލްޕް ޑެސްކެއް އަދި ކޯލު ސެންޓަރެއް ވަނީ ޤާއިމްކޮށްފައެވެ. ކޯލު ސެންޓަރަށް ގުޅޭނެ ނަންބަރަކީ 900-4004 އެވެ. ކޯލު ސެންޓަރު އަދި ހެލްޕެ ޑެސްކުގެ ހިދުމަތް ސަރުކާރު ބަންދުނޫން ކޮންމެ ދުވަަހަކު ހެނދުނު 9:00 އިން 15:00 އަށް ލިބިވަޑައިގަންނަވާނެއެވެ.
ބޯހިޔާވަހިކަމުގެ ސިޔާސަތުގެ ޕްރޮގްރާމްތަކުގެ ދަށުން ފްލެޓާއި ގޯއްޗަށް އެދި ޖުމްލަ 58،505 އެޕްލިކޭޝަން މިނިސްްޓްރީއަށް ވަނީ ހުށަހަޅާފައެވެ. އެއީ ފްލެޓަށް އެދި 35،930 އެޕްލިކޭޝަން އަދި ބިމަށް އެދި 22،575 އެޕްލިކޭޝަންއެވެ.
ކިޔުންތެރިންގެ ހިޔާލު