ސަރުކާރުގެ “ބޯހިޔާވަހިކަން އެންމެނަށް” ސިޔާސަތުގެ ދަށުން ގޯއްޗާއި ފްލެޓަށް އެދި ހުށަހެޅުމަށް ދީފައިވާ މުއްދަތު މިރޭގެ ނިޔަލަށް ހަމަވާނެ ކަމަށް ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން ހާމަކޮށްފިއެވެ.
ކުރިން މި މުއްދަތު ހަމަވާނެ ކަމަށް އެ ވުޒާރާއިން ކަނޑައަޅާފައި އޮތީ މިދިޔަ މެއި މަހުގެ 31 ވަނަ ދުވަހުގެ ނިޔަލަށެވެ. ނަމަވެސް، އާންމުންނަށް އިތުރު ފުރުސަތު ދިނުމުގެ ގޮތުން މިހާރު ވަނީ މިރޭގެ 23:59 އާ ހަމައަށް ފޯމު ހުށަހެޅުމުގެ ފުރުސަތު އިތުރުކޮށްދީފައެވެ.
ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާގެ ސްޓޭޓް މިނިސްޓަރ އަޙްމަދު ނާޒިމް މުޙައްމަދު ވިދާޅުވީ، މިއީ މި ސްކީމަށް ފޯމު ހުށަހެޅުމަށް ދެވޭނެ އެންމެ ފަހު ފުރުސަތު ކަމަށެވެ.
މި މުއްދަތުގެ ފަހުން އިތުރު ފުރުސަތެއް މި ސްކީމްތަކަށް ހުށަހެޅުމަށް ލިބިގެން ނުދާނެ. އެހެންވީމައި ވަރަށް ސަމާލުކަންދީގެން ޕޯޓަލްގައިވާ މައުލޫމާތުތައް ރަނގަޅަށް ފުރުމަށްފަހު ހުށަހެޅުމަށް އިލްތިމާސްކުރަން، ނާޒިމް
މި ސްކީމުގެ ދަށުން ގްރޭޓަރ މާލެ ސަރަހައްދާއި އަލަށް ތަރައްޤީކުރާ ރަސްމާލެ ހިމެނޭހެން ޖުމްލަ 15,000 ގޯތި ދޫކުރުމަށް ވަނީ ހަމަޖެހިފައެވެ. އޭގެ ތެރޭގައި މާލޭގެ ރަށްވެހިންނަށް 10,000 ގޯތި، މާލޭގައި ދިރިއުޅޭ އެހެން ރަށްރަށުގެ މީހުންނަށް 3,000 ގޯތި، އަދި މައިމުޅަވެފައިވާ މީހުންނަށް 500 ގޯތި ހިމެނެއެވެ. މީގެ އިތުރުން މާލޭގެ ހަނި ގޯޅިތަކުގައި ހުރި ގޯތިތައް ދޫކޮށްލާ ފަރާތްތަކަށް 1,500 ގޯތި ޚާއްޞަކޮށްފައިވެއެވެ.
ފްލެޓް ދޫކުރުމަށް ސަރުކާރުން ނިންމާފައިވަނީ ޖުމްލަ 7,900 ފްލެޓެވެ. މީގެ ތެރެއިން 4,000 ފްލެޓް މާލޭ ރަށްވެހިންނަށް، 1,500 ފްލެޓް މާލޭގައި ދިރިއުޅޭ އެހެން ރަށްރަށުގެ މީހުންނަށް، އަދި 2,400 ފްލެޓް ޚާއްޞަ އިސްކަންދޭ ކެޓަގަރީތަކަށް ވަނީ ކަނޑައަޅާފައެވެ.
މި ފަހަރުގެ ސްކީމްގައި އުސޫލުތަކަށް ބައެއް ލުއިތައް ވެސް ވަނީ ގެނެސްފައެވެ. އެގޮތުން ކައިވެނިކޮށްގެން އުޅޭ މީހުންގެ ތެރެއިން އެކަކުގެ ނަމުގައި ބޯހިޔާވަހިކަމެއް އޮތް ނަމަވެސް އަނެކާއަށް ކުރިމަތިލެވޭ ގޮތަށް ވަނީ ހަމަޖައްސާފައެވެ. އަދި ނުކުޅެދުންތެރިކަން ހުންނަ ފަރާތްތަކަށް ޚާއްޞަ ކެޓަގަރީގެ ޝަރުޠުތަކަށް ބަދަލު ގެނެސް، އެ ފަރާތްތަކަށް ވެސް ފުރުސަތު ވަނީ ފުޅާކޮށްފައެވެ.
ރައީސް ޑރ. މުޙައްމަދު މުޢިއްޒުގެ ސަރުކާރުން ބޯހިޔާވަހިކަމުގެ މަޝްރޫޢުތައް ހަލުވިކަމާއެކު ކުރިއަށްގެންދާއިރު، ހުޅުމާލެއާއި ވިލިމާލޭގައި ބައެއް ފްލެޓްތަކުގެ ބިންގާ މިހާރު ވަނީ އަޅާފައެވެ. އަދި އަގުހެޔޮކޮށް ފްލެޓް ގަންނަން ބޭނުންވާ ފަރާތްތަކަށް ޚާއްޞަ މަޝްރޫޢުތައް ކުރިއަށްގެންދާނެ ބަޔަކު ހޯދުމުގެ މަސައްކަތްވެސް ވުޒާރާއިން ދަނީ ކުރަމުންނެވެ.
ކިޔުންތެރިންގެ ހިޔާލު