މި ސަރުކާރުން ކުރިއަށް ގެންދާ “އެންމެނަށް ބޯހިޔާވަހިކަން” ސްކީމަށް ނުކުޅެދުންތެރިކަން ހުންނަ މީހުންގެ ފަރާތުން އެ މީހުންގެ ބެލެނިވެރިން ފްލެޓަށް ކުރިމަތިލާ އިރު، ނުކުޅެދުންތެރިކަން ހުންނަ މީހެއްކަން ސާބިތުކުރާނެ ލިޔުން ހުށަހަޅަން ނުޖެހޭނެ ކަމަށް ހައުސިން މިނިސްޓްރީން ބުނެފިއެވެ.
މި ސަރުކާރުން ކުރިއަށް ގެންދާ “އެންމެނަށް ބޯހިޔާވަހިކަން” ސްކީމަށް ނުކުޅެދުންތެރިކަން ހުންނަ ފަރާތްތަކަށް ހާއްސަކޮށްފައިވާ ކެޓަގަރީއަށް، އެފަރާތްތަކުގެ ބަދަލުގައި ބެލެނިވެރިންނަށް އެޕްލައި ކުރެވޭގޮތަށް މިދިޔަ މަހު ވަނީ އުސޫލު ބަދަލުކޮށްފައެވެ.
މިދިޔަ މަހުގެ 10 ވަނަ ދުވަހު ގެނައި އެ އިސްލާހާއެކު، އެންސްޕާގައި ރަޖިސްޓްރީވެފައިވާ ބެލެނިވެރިންނަށް މިދިޔަ މަހުގެ 20 ވަނަ ދުވަހުން ފެށިގެން ފްލެޓަށް އެދި ހުށަހެޅުމުގެ ފުރުސަތު ވަނީ ހުޅުވާލައިފައެވެ.
އެ ކެޓަގަރީން ފޯމު ހުށަހެޅުމުގެ ސުންގަޑިއަކީ އަންނަ ހޯމަ ދުވަހެވެ.
ހައުސިން މިނިސްޓްރީން މިއަދު ބުނީ އެންސްޕާގައި ރަޖިސްޓްރީވެފައިވާ ބެލެނިވެރި ފަރާތުން އެޕްލިކޭޝަން ހުށަހަޅާނަމަ، އެކަން ސާބިތުކޮށްދޭ ލިޔުން އިތުރަށް ހުށަހަޅަން ނުޖެހޭނެ ކަމަށެވެ.
ނުކުޅެދުންތެރިކަން ހުންނަ ފަރާތްތަކަށް ލުއިފަސޭހަ ކޮށްދިނުމުގެ ގޮތުން ސަރުކާރުން ވަނީ އިތުރު ބަދަލުތަކެއްވެސް ގެނެސްފައެވެ. އެގޮތުން، އާންމު ފަރާތްތަކުން މާލެ ސަރަހައްދުގައި 15 އަހަރު ދިރިއުޅެފައިވާން ޖެހުނު ނަމަވެސް، ނުކުޅެދުންތެރިކަން ހުންނަ ފަރާތްތަކަށް އެ މުއްދަތު ވަނީ ފަސް އަހަރަށް ކުޑަކޮށްދީފައެވެ. މީގެ އިތުރުން، ބަލީގެ ހާލަތަށް ފަރުވާ ހޯދުމަށް މާލެއަށް ދަތުރުކުރަން ޖެހޭ ފަރާތްތަކާއި، ފަރުވާއަށް މާލެ ބަދަލުވެފައިވާ ފަރާތްތަކަށްވެސް މި ކެޓަގަރީގެ ދަށުން ކުރިމަތިލުމުގެ ފުރުސަތު ވަނީ ފަހިކޮށްދީފައެވެ.
ރައީސް ޑރ. މުހައްމަދު މުއިއްޒުގެ ސަރުކާރުން މިހާރު ހުޅުވާލާފައިވާ މި މަޝްރޫއުގެ ދަށުން ޖުމްލަ 7,900 ފްލެޓާއި 15,000 ގޯތި ދޫކުރުމަށް ވަނީ ހަމަޖެހިފައެވެ.
ކިޔުންތެރިންގެ ހިޔާލު