ތ. ވޭމަންޑޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ އަމަލީ މަސައްކަތް ރޯޑް ޑިވެލޮޕްމަންޓް ކޯޕަރޭޝަން، އާރްޑީސީން ފަށައިފިއެވެ.
ޕީއެސްއައިޕީގެ ދަށުން ހިންގާ މި މަޝްރޫޢޫގެ މަސައްކަތް ރަސްމީކޮށް ފަށާފައިވަނީ އެރަށުގެ މައި މަގުންނެވެ. އެގޮތުން މިހާރު ކުރިއަށްދަނީ ކޭބަލް ޖަންކްޝަންތައް އިންސްޓޯލްކުރުމުގެ މަސައްކަތްކަމަށް އާރުޑީސީން ބުންޏެވެ.
މި މަޝްރޫޢަށް ބޭނުންވާ ހޮޅިތައް މި މަހުގެ 22 ވަނަ ދުވަހު ވަނީ އެ ރަށަށް ގެންގޮސްފައެވެ. މިދިޔަ އަހަރުގެ ސެޕްޓެމްބަރު މަހުގެ ތެރޭގައި 86.7 މިލިއަން ރުފިޔާއަށް އާރްޑީސީއާ ހަވާލުކުރި މި މަޝްރޫޢު ނިންމުމަށް ދީފައިވަނީ 2 އަހަރު ދުވަހުގެ މުއްދަތެކެވެ.
ވޭމަންޑޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢުގެ ދަށުން، އެ ރަށުގެ މުހިންމު މުއައްސަސާތައް ހުންނަ މަގުތަކާއި އާންމުކޮށް ބޭނުންކުރާ މަގުތައް ހިމެނޭހެން ޖުމްލަ 7 މަގެއް ހެދުމަށް ވަނީ ހަމަޖެހިފައެވެ. އެއީ، ޖުމްލަ 3.99 ކިލޯމީޓަރުގެ މަގެވެ.
މި އެއްބަސްވުމުގެ ދަށުން މަގުތަކުގެ ސަރވޭތައް ކުރުމާއި، ޑީޓެއިލް ޑިޒައިން އެކުލަވާލުމާއި، މަގުތަކުގައި ފެންހިންދާ ނިޒާމު ޤާއިމުކުރުމާއި، ތާރު އެޅުމުގެ އިތުރުން ފިނިޝިންގ މަސައްކަތްތަކާއި މަގުބައްތި ޖެހުމުގެ މަސައްކަތްތައް ކުރިއަށްދާނެއެވެ.
ކިޔުންތެރިންގެ ހިޔާލު