ކޮޅުމަޑުލު ވޭމަންޑޫ މަގު ހެދުމުގެ ޢަމަލީ މަސައްކަތް ފެށުމަށް ތައްޔާރުވެއްޖެއެވެ.
މަސައްކަތުގެ ކޮންޓްރެކްޓަރ އާރްޑީސީން ބުނީ ޕަބްލިކް ސެކްޓަރ އިންވެސްޓްމަންޓް ޕްރޮގްރާމުގެ ދަށުން ވޭމަންޑޫ މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢަށް ބޭނުންވާ ހޮޅިތައް މިހާރު އެރަށަށް ގެންގޮސްފައިވާ ކަމަށެވެ. ވޭމަންޑޫ މަގުތައް ތަރައްޤީ ކުރުމުގެ މަސައްކަތުގެ ދަށުން އެރަށުގެ މައި 7 މަގު ތަރައްޤީ ކުރާނެއެވެ. އެއީ، އެރަށުގެ މުހިންމު މުވައްސަސާތައް ހުންނަ މަގުތަކާއި، ރަށުގައި އާއްމުކޮށް ބޭނުންކުރާ މަގުތަކެވެ. ޖުމުލަ 3.99 ކިލޯ މީޓަރުގެ މަގު ތަރައްޤީ ކުރުމަށް ވަނީ ހަމަޖެހިފައެވެ.
މި މަސައްކަތް އެކުންފުންޏާ ހަވާލުކުރީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ. މިއީ 86.7 މިލިޔަން ރުފިޔާގެ މަޝްރޫޢެކެވެ.
މި އެއްބަސްވުމުގެ ދަށުން މަގު ހެދުމުގެ ސަރވޭތައް ކުރުމާއި، ޑީޓެއިލް ޑިޒައިންގެ މަސައްކަތްތައް ކުރިއަށް ގެންދާނެއެވެ. އަދި މަގުގައި ފެން ހިންދާ ނިޒާމު ޤާއިމުކުރުމާއި، ތާރު އެޅުމާއި، މަގުތަކުގެ ފިނިޝިންގެ މަސައްކަތްތަކާއި މަގުގައި ބައްތި ޖެހުމުގެ މަސައްކަތް ކުރިއަށް ގެންދާނެއެވެ. މަސައްކަތް ނިންމުމަށް ހަވާލުކޮށްފައިވަނީ، 2 އަހަރުގެ މުއްދަތުންނެވެ.
މިމަސައްކަތްތަކުގެ ތެރޭގައި ވޭމަންޑޫއާއި ކިނބިދޫ ކޯޒްވޭއަކުން ގުޅާލުމާއި، އެ ދެމެދުގައި އޮންނަ ފަޅުރަށް “އެލާ” ފަތުރުވެރިކަމަށް ތަރައްޤީކުރުން ހިމެނެއެވެ. މީގެ ތެރޭގައި މަގު ހެދުމުގެ މަސައްކަތް ނިންމުމާއި، އެރަށުގައި 500 މީހުންގެ ޖާގައިގެ މިސްކިތެއް ބިނާކުރުން ހިމެނެއެވެ.
ކިޔުންތެރިންގެ ހިޔާލު