ސަރުކާރުގެ ފުރަތަމަ ބޯހިޔާވަހިކަމުގެ މަޝްރޫއުގެ ދަށުން މާލެ ސަރަހައްދުން ގޯއްޗާއި ފްލެޓު ލިބޭ މީހުންގެ ލިސްޓު މިއަހަރުގެ ޑިސެމްބަރު މަހުގެ ތެރޭގައި އާންމުކުރުމަށް ހައުސިން މިނިސްޓްރީން ނިންމައިފިއެވެ.
ދައުލަތުގެ މީޑިއާއިން ގެނެސްދިން “ރާއްޖެމިއަދު” ޕްރޮގްރާމުގައި ވާހަކަދައްކަވަމުން ހައުސިން މިނިސްޓްރީގެ ސްޓޭޓް މިނިސްޓަރު އަހުމަދު ނާޒިމް މުހައްމަދު ވިދާޅުވީ، ލިސްޓު އާންމުކުރުމަށްޓަކައި ކުރަންޖެހޭ ފޯމުތައް ވެރިފިކޭޝަން ކުރުމުގެ މަސައްކަތްތައް މިހާރު ކުރިއަށްދާ ކަމަށެވެ. “ބޯހިޔާވަހިކަން އެންމެނަށް” ސިޔާސަތުގެ ދަށުން މާލެ ސަރަހައްދުން ގޯއްޗާއި ފްލެޓަށް އެދި ހުށަހެޅުމަށް ހުޅުވާލި މުއްދަތު މިދިޔަ ޖޫން މަހުގެ 15 ގައި ހަމަވިއިރު، “ބޯހިޔާވަހިކަން ޕޯޓަލް” މެދުވެރިކޮށް ޖުމްލަ 58,505 ފޯމު ވަނީ ހުށަހަޅާފައެވެ.
ހައުސިން މިނިސްޓްރީގެ މައުލޫމާތުތަކަށް ބަލާއިރު، ހުށަހެޅުނު ފޯމުތަކުގެ ތެރޭގައި ފްލެޓަށް އެދި ހުށަހެޅި 35,930 ފޯމާއި ގޯއްޗަށް އެދި ހުށަހެޅި 22,575 ފޯމު ހިމެނެއެވެ. ފޯމުތަކުގައިވާ މައުލޫމާތާއި ސަރުކާރުގެ އިދާރާތަކުން ލިބިފައިވާ މައުލޫމާތުގައި ފުށުއެރުމެއްވާ ނަމަ، އެކަން ޕޯޓަލް މެދުވެރިކޮށް އެޕްލިކަންޓަށް އަންގައި، އެކަންކަން އިސްލާހުކުރުމަށް ހަތް ދުވަހުގެ މުއްދަތެއް ދިނުމަށް ވަނީ ހަމަޖެހިފައެވެ.
ސްޓޭޓް މިނިސްޓަރު ނާޒިމް ވަނީ އެއްވެސް މައުލޫމާތެއް އިސްލާހުކުރަން ޖެހިއްޖެ ނަމަ، އެންމެ ފަހު ވަގުތަށް މަޑުނުކޮށް އަވަހަށް ޕޯޓަލް މެދުވެރިކޮށް އެކަން ނިންމެވުމަށް އެދިވަޑައިގެންފައެވެ. އަދި ސިޓީއާއި އީމެއިލްގެ ބަދަލުގައި ހުރިހާ މުއާމަލާތްތަކެއްވެސް ޕޯޓަލް މެދުވެރިކޮށް ކުރުމުން މައުލޫމާތުތައް ޓްރެކްކޮށް، މައްސަލަތައް އިމީޑިއެޓްކޮށް ހައްލުކުރުމަށް ވަރަށް ބޮޑަށް ފަސޭހަވެގެންދާނެކަން އޭނާ ފާހަގަކުރެއްވިއެވެ.
މި މަޝްރޫއުގެ ދަށުން މާލޭގެ ރަށްވެހިންނަށް 4,000 ފްލެޓު އަދި މާލޭގައި ދިރިއުޅޭ އެހެން ރަށްރަށުގެ މީހުންނަށް 1,500 ފްލެޓުގެ އިތުރުން ހާއްސަ ކެޓަގަރީތަކަށް 2,400 ފްލެޓު ދޫކުރުމަށް ވަނީ ކަނޑައަޅާފައެވެ. މި ފްލެޓުތަކުގެ މަސައްކަތް އެކި ކުންފުނިތަކާ ހަވާލުކޮށްގެން ފަށާފައިވާއިރު، 2028 ވަނަ އަހަރުގެ މެދުތެރޭގައި އެއްކޮށް ނިންމައި ހަވާލުކުރެވޭނެކަމަށް ސަރުކާރުން ބުނެއެވެ. މީގެ އިތުރުން ހިއްކަމުންދާ ރަސްމާލެއިންވެސް ފުރަތަމަ ބުރުގައި 15,000 ގޯތި ދޫކުރުމަށް ވަނީ ނިންމާފައެވެ.
ކިޔުންތެރިންގެ ހިޔާލު