އިންފޯމޭޝަން ކޮމިޝަނުގެ މަގާމުގެ ދައުރު ހަމަވާތީ އެ މަގާމަށް ބޭފުޅަކު އައްޔަންކުރުމަށް ހުޅުވައިލުމުން ކުރިމަތިލެއްވި ބޭފުޅުންގެ ތެރެއިން އެ މަގާމަށް އައްޔަންކުރެއްވުމަށް ރައީސުލްޖުމްހޫރިއްޔާއަށް ފެނިވަޑައިގަންނަވާ ބޭފުޅެއްގެ ގޮތުގައި ކުރީގެ އިންފޯމޭޝަން ކޮމިޝަނަރު ޢަބްދުލްޢަޒީޒް ޖަމާލު އަބޫބަކަރުގެ ނަންފުޅު ރައްޔިތުންގެ މަޖިލީހަށް ރައީސް ޑރ.މުޙައްމަދު މުޢިއްޒު ފޮނުއްވައިފިއެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އުފައްދާފައިވާ އިންފޮމޭޝަން ކޮމިޝަނަރުގެ މަގާމު އެންމެ ފުރަތަމަ އަދާކުރެއްވި ބޭފުޅަކީ ޢަބްދުލްޢަޒީޒް ޖަމާލް އަބޫބަކުރެވެ. އޭނާއަކީ 17 ވަނަ ރައްޔިތުންގެ މަޖިލީހުގައި މައުލޫމާތު ހޯދައި ލިބިގަތުމުގެ ހައްގުގެ ގާނޫނު އެކުލަވަައިލުމުގެ މަސައްކަތުގައި އިސްދައުރެއް އަދާކުރެއްވި ބޭފުޅެކެވެ.
އިންފޯމޭޝަން ކޮމިޝަނަރުގެ މަގާމުގައި ހުންނެވި ދުވަސްވަރު މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އެކުލަވައިލަންޖެހޭ ގިނަ ގަވާއިދުތަކެއް އެކުލަވައިލައްވައި، ކޮމިޝަނަރުގެ އޮފީހުގެ އިދާރީ އޮނިގަނޑުތަކާއި ތަރުތީބުތައް އިންތިޒާމުކުރެއްވުމުގައިވެސް ގިނަ މަސައްކަތްތަކެއް ޢަބްދުލްޢަޒީޒު ކުރެއްވިއެވެ.
ޢަބްދުލްޢަޒީޒް މިވަގުތު ހުންނެވީ ސަގާފަތާއި ފަންނާއި ތަރިކައާ ބެހޭ ވުޒާރާގެ ސްޓޭޓް މިނިސްޓަރެއްގެ މަގާމުގައެވެ.
އިންފޮމޭޝަން ކޮމިޝަނަރުގެ މަގާމަށް ކުރިމަތިލުމުގެ ފުރުސަތު ހުޅުވައިލީ އަންނަ ސެޕްޓެންބަރު މަހުގެ ހަވަނަ ދުވަހު މިހާރު އެ މަގާމުގައި ހުންނެވި އަޙްމަދު އާހިދު ރަޝީދުގެ މަގާމުގެ މުއްދަތު ހަމަވާތީއެވެ. އެ މަގާމަށް ކުރިމަތިލުމަށް ހުޅުވައިލުމުން އަޒީގެ އިތުރަށް ބައެއް ބޭފުޅުން ކުރިމަތިލައްވާފައިވާއިރު، އެ ބޭފުޅުންގެ ނަންތައްވެސް ރައީސް މަޖިލީހަށް ފޮނުއްވިއެވެ.
މިއަދުގެ މަޖިލީހުގައި ރައީސްގެ ސިޓީ އަމީން އާއްމު އިއްވަވައިދެއްވުމުން މަޖިލީހުގެ ރިޔާސަތު ނިންމަވާފައިވަނީ އަޒީގެ ނަންފުޅު ދިރާސާކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް ފޮނުއްވުމަށެވެ.
ކިޔުންތެރިންގެ ހިޔާލު