މުދާ ބޯޑަރަށް އައުމުގެ ކުރިން ކަސްޓަމްސްގެ މައުލޫމާތު ދުރާލާ ބަދަލުކުރުމުގެ އައު އޮނިގަނޑެއް ގާއިމުކުރުމަށްޓަކައި ދިވެހިރާއްޖެ، ބަންގްލަދޭޝް، ބޫޓާން އަދި ނޭޕާލްގެ ކަސްޓަމްސް އިދާރާތަކުގެ މެދުގައި މެމޮރެންޑަމް އޮފް އިންޓެންޓް (އެމްއޯއައި) އެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކޮށްފައިވަނީ މާލޭގައި މޯލްޑިވްސް ކަސްޓަމްސް ސަރވިސްއިން އިންތިޒާމުކޮށްގެން ކުރިއަށްގެންދިޔަ ސައުތު އޭޝިއާ ސަބްރީޖަނަލް އިކޮނޮމިކް ކޯޕަރޭޝަން (ސަސެކް) ގެ ސައުދަވާނަ ކަސްޓަމްސް ގްރޫޕް ބައްދަލުވުމުގެ ތެރެއިންނެވެ. މިއީ ސަރަހައްދީ ވިޔަފާރި ފުޅާކުރުމަށާއި ކަސްޓަމްސްގެ ކަންކަން އަވަސްކުރުމަށްޓަކައި އެކުލަވާލެވުނު މުހިންމު އޮނިގަނޑެކެވެ.
މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ކޮމިޝަނަރ ޖެނެރަލް އޮފް ކަސްޓަމްސް ފާތިމަތު ދިޔާނާއެވެ. ސޮއިކުރުމުގެ ރަސްމިއްޔާތު ޝަރަފުވެރިކޮށްދެއްވީ ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާންގެ އިތުރުން އޭޝިއަން ޑިވެލޮޕްމަންޓް ބޭންކް (އޭޑީބީ) ގެ ޕްރިންސިޕަލް ރީޖަނަލް ކޯޕަރޭޝަން ސްޕެޝަލިސްޓް ޑރ. ޔުރެންދުރަ ބަސްނެތެވެ.
ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވުޒާރާއިން ހާމަކުރިގޮތުގައި، މި އައު އޮނިގަނޑުގެ ދަށުން، މި ހަތަރު ގައުމުގެ މެދުގައި އެއް ގައުމުން އަނެއް ގައުމަށް އެތެރެކޮށް ބޭރުކުރާ މުދާ އުފުލާ އުޅަނދު ބަނދަރުކުރުމުގެ ކުރިން، މުދަލާ ގުޅޭ މުހިންމު މައުލޫމާތުތައް ދުރާލާ އެ ގައުމެއްގެ ކަސްޓަމްސް އިދާރާއާ ހިއްސާކުރެވޭނެއެވެ. މީގެ ސަބަބުން ކަސްޓަމްސްގެ ގަވާއިދުތަކަށް އަމަލުކުރުން ހަރުދަނާވެ، ނުރައްކާތައް ދެނެގަތުމުގެ ނިޒާމު ފުރިހަމަވެގެންދާނެއެވެ. އަދި ބޯޑަރު ސަރަހައްދުތަކުގެ ސަލާމަތާއި ރައްކާތެރިކަން އިތުރުވެ، ކަސްޓަމްސް އިދާރާތަކުގެ މެދުގައި އޮންނަ ގުޅުން އިތުރަށް ބަދަހިވެގެންދާނެ ކަމަށް ކަސްޓަމްސްއިން މައުލޫމާތު ދެއެވެ.
މި ނިޒާމުގެ ސަބަބުން ވިޔަފާރިވެރިންނަށާއި އަމިއްލަ ސެކްޓަރަށް ބޮޑެތި ފައިދާތަކެއް ލިބިގެންދާނެ ކަމަށް ކަސްޓަމްސްއިން އިތުރަށް ބުންޏެވެ. މުދަލުގެ މައުލޫމާތު ކުރިން ލިބުމުން ބޯޑަރުގައި މުދާ ލަސްވުން ކުޑަކުރެވި، ލޮޖިސްޓިކްސް ހަރަދުތައް ކުޑަވެގެންދާނެއެވެ. އަދި ސަޕްލައި ޗެއިންގެ ރައްކާތެރިކަން ކަށަވަރުވެ، މުދާ ކްލިއަރކުރުން އަވަސްވެ، ސަރަހައްދީ ވިޔަފާރި އިތުރަށް ފުޅާވެގެންދާނެއެވެ.
ސަރުކާރުން ގަބޫލުކުރާގޮތުގައި މިއީ ސަސެކް އޮނިގަނޑުގެ ތެރެއިން ސަރަހައްދީ ގުޅުން ބަދަހިކުރުމަށާއި، ޑިޖިޓަލް ކަސްޓަމްސް ނިޒާމުތައް ތަރައްގީކޮށް ދެކުނު އޭޝިއާ ސަރަހައްދުގެ ބޯޑަރުތައް ހަރުދަނާކަމާއެކު ބެލެހެއްޓުމަށް އެޅުނު ވަރަށް މުހިންމު ފިޔަވަޅެކެވެ.
ކިޔުންތެރިންގެ ހިޔާލު