ހދ. ކުރިންބީ ސިއްހީ މަރުކަޒު އަޕްގްރޭޑް ކުރުމުގެ މަޝްރޫއުގެ ދަށުން، އިމާރާތުގެ ފައުންޑޭޝަނަށް ބޭނުންވާ ކޮނުމުގެ މަސައްކަތާއި ލީން ކޮންކްރީޓް އެޅުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ނިންމާލައިފިއެވެ.
މި މަޝްރޫއަކީ ކުރިންބީގެ ރައްޔިތުންނަށް ފޯރުކޮށްދޭ ސިއްހީ ހިދުމަތްތަކުގެ ފެންވަރު މަތިކޮށް، ސިއްހީ މަރުކަޒުގެ ޖާގަ ތަނަވަސްކުރުމުގެ ގޮތުން ސަރުކާރުން ކުރިއަށްގެންދާ މުހިންމު މަޝްރޫއެކެވެ. މަޝްރޫއުގެ މަސައްކަތްތައް ބާރުސްޕީޑުގައި ކުރިއަށްދާއިރު، ސައިޓުގައި މިހާރު ކުރިއަށްދަނީ ދެން ފުރިހަމަކުރަންޖެހޭ އަމަލީ މަސައްކަތްތަކަށް ވާންޖެހޭ ތައްޔާރީތަކެވެ.
އެމްޓީސީސީން ހާމަކޮށްފައިވާ ގޮތުގައި، މި އިމާރާތް ނިމުމުން ސިއްހީ މަރުކަޒަށް ބޭނުންވާ އިތުރު ވަސީލަތްތަކާއި ޖާގަ ލިބިގެންދާނެއެވެ. މީގެ އިތުރުން ރަށުގެ ސިއްހީ ހިދުމަތް އިތުރަށް ހަރުދަނާވެ، އާންމުންނަށް ލިބޭ ހިދުމަތުގެ ފެންވަރު ރަނގަޅުވެގެންދާނެކަމަށް އެ ކުންފުނިން ފާހަގަކުރެއެވެ.
މި މަޝްރޫއުގެ ކުރިއެރުންތައް މަސައްކަތް ކުރިއަށްދާވަރަކުން އެމްޓީސީސީން ހިއްސާކުރަމުންދާނެއެވެ.
ކިޔުންތެރިންގެ ހިޔާލު