ރާއްޖޭގެ ގައުމީ އެއާލައިން މޯލްޑިވިއަން ހިންގާ އައިލެންޑް އޭވިއޭޝަން ސަރވިސަސްއިން ވައިގެ ދަތުރުފަތުރުގެ ޓިކެޓަށް ފަތުރުވެރިންގެ އަތުން ނަގާ ފެއާ މުރާޖައާކޮށް ކުޑަކުރުމަށް ވަޒީރުންގެ މަޖިލީހުން އާދީއްތަ ދުވަހު ނިންމަވައިފިއެވެ.
ރައީސުލްޖުމްހޫރިއްޔާގެ އޮފީހުން މަޢުލޫމާތު ދެއްވި ގޮތުގައި މި ނިންމެވުމަކީ ދަތުރުފަތުރުގެ ދާއިރާ އިތުރަށް ހަރުދަނާކޮށް ފަތުރުވެރިންނަށް ލުއިފަސޭހަތަކެއް ހޯދައިދިނުމުގެ ގޮތުން ނިންމެވި ނިންމެވުމެކެވެ. އެހެންނަމަވެސް މި ފެއާ ކުޑަކުރައްވަން ނިންމެވީ ކިހާ ވަރަކަށްކަން އަދި ހާމަކުރައްވާފައެއް ނުވެއެވެ.
މި ނިންމެވުން ނިންމަވާފައިވަނީ ރައީސުލްޖުމްހޫރިއްޔާގެ އޮފީހުގައި ބޭއްވެވި ވަޒީރުންގެ މަޖިލީހުގެ ބައްދަލުވުމުގައެވެ.
މޯލްޑިވިއަންއިން މިހާރުވެސް ރާއްޖޭގެ އެތެރޭގެ އަށާރަ އެއާޕޯޓަކަށް ދަތުރުތައް ބާއްވަމުންދެއެވެ. އޭގެ އިތުރުން ބައެއް ރަށްރަށަށާއި ރިސޯޓުތަކަށް ސީޕްލޭންގެ ހިދުމަތްވެސް އެ ކުންފުނިން ފޯރުކޮށްދެއެވެ.
ބައިނަލްއަގުވާމީ ދަތުރުތަކަށް ބަލާއިރު މޯލްޑިވިއަންއިން އޮސްޓްރޭލިއާއާއި ޗައިނާގެ ތިން މަންޒިލަކަށް ދަތުރުކުރެއެވެ. އަދި ބަންގްލަދޭޝްއާއި އިންޑިއާގެ ދެ މަންޒިލެއްގެ އިތުރުން ތައިލެންޑަށްވެސް އެ އެއާލައިނުން ދަތުރުތައް ބާއްވަމުންދެއެވެ.
ކިޔުންތެރިންގެ ހިޔާލު