ރާއްޖެއަށް މަސްތުވާތަކެތި އެތެރެކުރަން އުޅުނު އިންޑިއާގެ ބަޔަކު ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ އިންޑިއާއަށް ނިސްބަތްވާ އަމިތު ކުމާރު 36އ. އާއި އަނިލް ކުމާރު 26އ، އާއި އާކާޝް ޔާދަވް 36އ. ގެ އިތުރުން ރާހުލް ނިޝާދު 23އ. އެވެ.
އެ މީހުންގެ ބަންދު އަމުރުން އެނގޭ ގޮތުގައި މަސްތުވާތަކެތި ރާއްޖެ އެތެރެކުރުމުގައި އިސްކޮށް ހުރީ އަމިތު ކުމާރެވެ. ދެން ހައްޔަރުކުރި މީހުން ހައްޔަރުކުރީ އަމިތު ކުމާރު ގެނައި މަސްތުވާތަކެތީގެ މައްސަލައިގައި ހިންގި ކޮންޓްރޯލް ޑެލިވަރީ އޮޕަރޭޝަނެއްގެ ތެރެއިންނެވެ.
ކޯޓު އަމުރުގައިވާ ގޮތުން އެ މީހުން ހައްޔަރު ކުރީ އަމިތު ރާއްޖެ އައިއިރު އޭނާގެ ލަގެޖުގެ ތެރެއަށް ލައިގެން ގެނައި މަސްތުވާތަކެއްޗާ ހަވާލުވާން ދިޔަ ތަނުންނެވެ.
ކޯޓުގައި ފުލުހުން ބުނެފައިވާ ގޮތުގައި ލަގެޖުން ފެނުނު މަސްތުވާތަކެތީގެ ބަރުދަނުގައި 706 ގްރާމް ހުއްޓެވެ.
މި މައްސަލައިގައި އެ މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް އިއްޔެ ހާޒިރުކުރުމުން އެ ކޯޓުން ވަނީ އެ މީހުންނަކީ ރާއްޖެއަށް މަސްތުވާތަކެތި ޓްރެފިކް ކުރާ ބައެއް ކަމަށް ތުހުމަތުކޮށް ބަންދުން ދޫކޮށްލައިފިނަމަ މުޖުތަމައަށް ނުރައްކާވެދާނެތީ، އެ އެންމެންގެ ބަންދަށް ފަސް ދުވަސް ޖަހައިފައެެވެ.
ކިޔުންތެރިންގެ ހިޔާލު