“މާލެ ޓެކްސީ ލައިން” އެޕްލިކޭޝަން ހެކުކޮށްފައިނުވާ ކަމަށާއި އާންމުންގެ ޒާތީ މައުލޫމާތުތައް ސޯޝަލް މީޑިއާއަށް ލީކުކޮށްލީ ކުންފުނީގެ މުވައްޒަފެއްކަން އެތެރޭގެ ތަހުގީގުން އެނގިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން މިއަދު ބުނެފިއެވެ.
އެމްޓީސީސީން ނެރުނު ބަޔާނެއްގައި ބުނީ، އެޕްލިކޭޝަންގެ ބެކްގްރައުންޑް ޑޭޓާބޭސްއަށް ބަދަލުތަކެއް ގެނެސް، އާންމުންގެ ޒާތީ މައުލޫމާތުތައް ލީކުކޮށްފައިވަނީ އެއްވެސް ހުއްދައެއް ނެތި، އަމިއްލަ ޒާތީ އަދި ސިޔާސީ މަގުސަދެއް ހާސިލުކުރުމުގެ ނިޔަތުގައި އެ ކުންފުނީގެ މުވައްޒަފަކު ކަމަށެވެ.
އެ މުވައްޒަފު މިހާރު ވަޒީފާގެ ޒިންމާތަކުން އެކަހެރިކޮށްފައިވާ ކަމަށާއި ކުންފުނީގެ ގަވައިދުތަކާއި އުސޫލުތަކުގެ ތެރެއިން އަޅަންޖެހޭ އެންމެ ހަރުކަށި ފިޔަވަޅު އޭނާއާމެދު އަޅާނެ ކަމުގެ ޔަގީންކަން އެމްޓީސީސީން ވަނީ ދީފައެވެ.
މާލެ ޓެކްސީ އެޕުގެ ބެކްގްރައުންޑް ސިސްޓަމަށް ބަދަލުތަކެއް ގެނެސްފައިވާކަން އައިސީޓީ ނެޓްވޯކް ސެކިއުރިޓީ ސިސްޓަމަށް ފާހަގަވުމާއެކު، ވަގުތުން އެ ސިސްޓަމް ސެކިއުރިޓީ ލޮކްޑައުންއަކަށް ގެނެސް ރައްކާތެރިކޮށްފައިވާ ކަމަށްވެސް އެ ކުންފުނިން ބުންޏެވެ. އަދި ކަސްޓަމަރުންނަށް ޓެކްސީ އެޕުން ޚިދުމަތް ހޯދުމުގައި އެއްވެސް ދަތިކަމެއް މެދުވެރިނުވާނެ ކަމަށް ވަނީ ބުނެފައެވެ.
މި މައްސަލަ ފެންމަތިވީ ޓެކްސީ އެޕްލިކޭޝަންގައި ޚިދުމަތްދޭ ބައެއް ޑްރައިވަރުންގެ ނަންތައް ބަދަލުވެ، އެޕްލިކޭޝަންގެ ޚިދުމަތް މުޅިން މެދުކެނޑުމާ ގުޅިގެންނެވެ. އޭގެ ފަހުން ސޯޝަލް މީޑިއާއަށް ލީކުވި މައުލޫމާތުތަކުގެ ތެރޭގައި އެޕްލިކޭޝަން ބޭނުންކުރި އާންމުންގެ ނަމާއި ފޯނު ނަންބަރާއި ވޮލެޓް އައިޑީގެ އިތުރުން އީމެއިލް އެޑްރެސް ހިމެނެއެވެ.
މާލެއާއި ހުޅުމާލެ އަދި ވިލިމާލޭގެ ރައްޔިތުންނަށް ދަތުރުފަތުރުގެ ޚިދުމަތް ދިނުމަށް “މާލެ ޓެކްސީ ލައިން” އިފްތިތާހުކުރީ މިދިޔަ އޭޕްރީލް މަހުގެ ދެވަނަ ދުވަހުގެ ރެއެވެ. ތިމާވެއްޓާ ރައްޓެހި ސައްތައިން ސައްތަ އިލެކްޓްރިކް 150 އުޅަނދާއެކު ފެށި މި ޚިދުމަތުގެ ފުރަތަމަ މަހު އެކަނިވެސް 13،000 އަށްވުރެ ގިނަ ދަތުރު ކޮށްފައިވާ ކަމަށް އެމްޓީސީސީގެ މައުލޫމާތުތަކުން ދައްކައެވެ.
ކިޔުންތެރިންގެ ހިޔާލު