ޔަހޫދީ ވަޒަންވެރިންގެ ގްރޫޕަކުން ހުޅަނގު އައްސޭރީގެ އަވަށެއް ހިސާރުކޮށްގެން އުޅޭ މައްސަލަ ވަރަށް ހޫނުވެއްޖެއެވެ.
ހުޅަނގު އައްސޭރީގެ ޤުސްރާ ނަމަކަށްކިޔުނު އަވަށެއް ޔަހޫދީ ވަޒަންވެރިން ހިފައި، އެ އަވަށުގެ ގެތައް ހިސާރުކޮށްގެން ތިބޭތާ ހަފްތާއެއް ވެއްޖެއެވެ.
އެމީހުންވަނީ، ޤުސްރާ އަވަށުގެ ގެތަކަށް ކާބޯތަކެތި ވެއްދުން ހުއްޓުވައި އަދި އެ އަވަށުގެ ގެތަކުން ފެނާއި ކަރަންޓުވެސް ކަނޑާލާފައެވެ. ގެތަކުގެ ތެރޭގައި އާންމުން ތާށިވެ ބޭރަށްވެސް ނުކުމެވޭނޭ އެއްވެސް ގޮތެއް ވަނީ ނެތިފައެވެ.
ނުވިތާކަށް، އެ ވަށުގެ ބައެއް ގެތަކުން ގަދަކަމުން އާންމުން ނެރެ، އެ ގެތައް ހިފައި، އެމީހުންގެ މަރުކަޒުތަކަށް ހަދާފައި ވެއެވެ.
ޔަހޫދީ ވަޒަންވެރިން މިހުރިހާ ޖަރީމާއެއް ހިންގަމުން ގެންދާއިރު، އިސްތިއުމާރީ ފުލުހުން އެ އަވަށުގައި ހަރަކާތްތެރިވަމުން ދެއެވެ. ޔަހޫދީ ވަޒަންވެރިން ހުއްޓުވަން އެމީހުން އެއްވެސް ކަމެއް ނުކުރެއެވެ.
އާންމު އެތައް އާއިލާއެއް ގެތަކުގައި ތާށިވެ ހާލުގައި ޖެހިފައިވާތީ އިންސާނީ ހައްގުތަކަށް މަސައްކަތްކުރާ އެކްޓިވިސްޓުންވަނީ ކާބޯތަކެއްޗާއި ބޯފެން ހިފައިގެން އެ އަވަށަށް ވަންނަންވެސް މަސައްކަތް ކޮށްފައެވެ. ނަމަވެސް ޒަޔަނިސްޓު ފުލުހުންވަނީ އެމީހުންނަށް ހުރަސް އަޅާފައެވެ.
ޔަހޫދީ ވަޒަންވެރިންގެ މި ޖަރީމާތައް ދުނިޔެއިން ކުށްވެރި ކުރަމުން ގެންދާއިރު، ފްރާންސްގެ ސަރުކާރުންވަނީ، މި ޖަރީމާ ހިންގާ ވަޒަންވެރިން ހިފައި ހައްޔަރުކޮށް އަދަބުދިނުމަށް އިސްތިއުމާރީ ދައުލަތަށް ގޮވާލާފައެވެ.
ފަލަސްތީނުގެ ބިންތަކުގައި ދިރިއުޅޭ ޔަހޫދީ ވަޒަންވެރިން ހިންގާ ހަމަނުޖެހުންތަކާއި، ޖަރީމާތައް މިހާރުވަނީ ވަރަށް ބޮޑަށް އިތުރުވެގެން ގޮސްފައެވެ. ފަލަސްތީނު މީހުން ޝަހީދުކުރުމާއި، ގެދޮރުން ނެރެ ގެތައް ހިފުމާއި، ގެތަކާއި އިމާރާތްތަކުގައި ހުޅުޖަހައި އެންދުމާއި، ދަނޑުބިންތަކުގައި ހުޅުޖެހުން މިހާރު އާންމު ކަމަކަށް ހަދާފައި ވެއެވެ.
އެހެން ނަމަވެސް، ވަޒަންވެރިން ހިންގާ މި ޖަރީމާތައް ހުއްޓުވަން އިސްތިއުމާރީ ސިފައިން އަދި އިސްތިއުމާރީ ދައުލަތުންވެސް އެއްވެސް ކަމެއް ނުކުރެއެވެ.
ކިޔުންތެރިންގެ ހިޔާލު