ފަލަސްތީނުގެ ރިޔާސީ އިންތިޚާބާއި ގާނޫނުހަދާ މަޖިލީހުގެ އިންތިޚާބު އެއް ދުވަހެއްގައި ބާއްވަން ފަލަސްތީނުގެ ރައީސް މަހްމޫދު އައްބާސް ނިންމައިފިއެވެ.
ފަލަސްތީނުގެ ރައީސް މިގޮތަށް ނިންމެވީ، މިއަދު ނެރުއްވި ރިޔާސީ ގަރާރަކުންނެވެ.
ފަލަސްތީނުގެ ގާނޫނުހަދާ މަޖިލީހުގެ އިންތިޚާބު ބާއްވާގޮތަށް ކުރިން ތާވަލް ކޮށްފައި އޮތީ މިއަހަރުގެ ނޮވެމްބަރު މަހުގެ 28 ވަނަ ދުވަހުއެވެ.
އެހެން ނަމަވެސް، ފަލަސްތީނުގެ ރައީސް މަހްމޫދު އައްބާސް ނިންމެވީ، ފަލަސްތީނުގެ ރިޔާސީ އިންތިޚާބާއި، ގާނޫނުހަދާ މަޖިލީހުގެ އިންތިޚާބު އަންނަ 2027 ވަނަ އަހަރުގެ ސެޕްޓެމްބަރު މަހުގެ 11 ވަނަ ދުވަހު ބާއްވާ ގޮތަށެވެ.
ނޮވެމްބަރު 28 ގައި ބާއްވަން ތާވަލްކުރި ގާނޫނުހަދާ މަޖިލީހުގެ އިންތިޚާބު އަންނަ އަހަރަށް ފަސްކުރެއްވި ސަބަބެއް ކަމަށް ރައީސްގެ ގަރާރުގައި ފާހަގަ ކުރައްވާފައިވަނީ، އިސްރާއީލުން އަސްކަރީ އުދުވާނުތައް ހިންގަމުން ގެންދިއުމާއި، ފަލަސްތީނުގެ ބިންތަކުގައި ޔަހޫދީ އަބާދީތައް ހެދުން ފުޅާކުރަމުން ގެންދިއުމާއި، ޣައްޒާއާއި ހުޅަނގު އައްސޭރީގައި އާންމުން ހިނގާބިނގާވެ އުޅުމަށް ހުރަސްއެޅުމާއި އަދި ދިމާވެފައިވާ ސަލާމަތީ ގޮންޖެހުންތަކުގެ ސަބަބުން މިނިވަން އިންސާފުވެރި އިންތިޚާބުތަކެއް ބޭއްވުމަށް ހުރަސްއެޅޭތީ ކަމަށެވެ.
އިންތިޚާބު ފަސްކުރުމުގެ މަގުސަދަކީ ގައުމީ މަޝްވަރާތަކަށް ފުރުސަތު ދިނުމާއި، މުޅި ޣައްޒާ، ހުޅަނގު އައްސޭރި އަދި އިރުމަތީ ގުދުސްގައިވެސް އިންތިޚާބު ބޭއްވުމަށް މަގުފަހިކުރުން ކަމަށްވެސް، ގަރާރުގައި ބަޔާންކޮށްފައި ވެއެވެ.
ފަލަސްތީނުގައި ރިޔާސީ އިންތިޚާބާއި ގާނޫނުހަދާ މަޖިލީހުގެ އިންތިޚާބު ނުބާއްވާތާ 20 އަހަރު ވެއްޖެއެވެ. ފަލަސްތީނުގައި އެންމެފަހުން އިންތިޚާބެއް ބާއްވާފައިވަނީ 2006 ވަނަ އަހަރުއެވެ.
ކިޔުންތެރިންގެ ހިޔާލު