މެދުއިރުމަތީގައި މިހާރުއޮތް ހަނގުރާމަމަތީ މަތިންދާ ބޯޓު އުފުލާ ކެރިއަރ، ޔޫއެސްއެސް އަބްރަހަމް ލިންކަންގެ
ބަދަލުގައި އެހެން ކެރިއަރެއް އެ ސަރަހައްދަށް ފޮނުވަން އެމެރިކާ އަސްކަރިއްޔާއިން ނިންމުމުން ތަފާތު ވާހަކަތައް ފެތުރެން ފަށައިފިއެވެ.
ޔޫއެސްއެސް އަބްރަހަމް ލިންކަންގެބަދަލުގައި މެދުއިރުމައްޗަށް ފޮނުވަން އެމެރިކާއިން ނިންމީ ޔޫއެސްއެސް ޖޯޖް ވޮޝިންޓަންއެވެ.
އެތެރޭގެ މަސްދަރަކާ ހަވާލާދީ އެމެރިކާގެ އަސްކަރީ ހަބަރުތައް ގެނެސްދޭ ނޫހަކުން ބުނެފައިވަނީ، އަބްރަހަމް ލިންކަން އަނބުރާ ގެންގޮސް، ޖޯޖް ވޮޝިންޓަން ސަރަހައްދަށް ފޮނުވަނީ ރޮޓޭޝަން ޕްލޭނެއްގެ ދަށުން ކަމަށާއި، އެއީ މާ ކުރިންވެސް ތާވަލް ކުރެވިފައިވާ ކަމެއް ކަމަށެވެ.
މި ނިންމުން އިއުލާން ކުރުމާއެކު، އަބްރަހަމް ލިންކަންގެ ހާލަތާމެދު އެމެރިކާގެ ސިޔާސީ ފަރާތްތަކާއި، މީޑިއާއިންވެސް ތަފާތު ވާހަކަތައް ދައްކައި، ކަންބޮޑުވުންރތައް ފާޅުކުރަން ފަށާފައި ވެއެވެ.
އެގޮތުން، އަބްރަހަމް ލިންކަންގެ ހާލަތު ވަރަށް ގޯސް ކަމަށް ބުނެ ރިޕޯޓްތައް ފެތުރިފައި ވެއެވެ. އަސާސީ ސާމާނާއި، ކާބޯތަކެތި މަދުވުމާއި، ފެން ތަޣައްޔަރުވުމާއި، ރައްކާތެރިކަން ކުޑަވުމާއި، ކެރިއަރުގައި ތިބި ސިފައިންނާއި އާއިލާތަކާ މުއާމަލާތް ކުރެވޭގޮތް މެދުކެނޑުމާއި، ސިފައިންގެ ތެރޭގައި ނަފްސާނީ މައްސަލަތައް އިތުރުވެ، ސިފައިން އަމިއްލައަށް މަރުވާން ކަނޑަށް ފުންމާލަން އުޅުމުގެ އެތަކެއް މައްސަލަތަކެއްވެސް، އަބްރަހަމް ލިންކަންއަށް ދިމާވެފައިވާ ކަމަށް ރިޕޯޓްތައް ފެތުރިފައި ވެއެވެ.
އަބްރަހަމް ލިންކަން ކަނޑުމަތީގެ އޮޕަރޭޝަންތަކުގައި މެދުނުކެނޑި ހަރަކާތްތެރިވާތާ 250 ދުވަސް ވެފައިވާ ކަމަށް ވެއެވެ.
އެ ކެރިއަރާ ގުޅޭގޮތުން ތަފާތު ވާހަކަތައް ފެތުރޭން ފެށުމުން އެމެރިކާ ސަރުކާރުގެ ހަނގުރާމައިގެ ވަޒީރު ޕީޓް ހެގްސެތުވަނީ، އެ ވާހަކަތައް ދޮގުކޮށްފައެވެ. އޭނާ ބުނީ، އަބްރަހަމް ލިންކަންގެ ހާލަތާ ގުޅޭގޮތުން އަސްކަރިއްޔާއިން ހާމަކުރި ވާހަކަތައް އޮޅުވާލީ ކަމަށެވެ. އެއީ ހަގީގަތް ނޫން ކަމަށެވެ. އަދި އަބްރަހަމް ލިންކަންގައި ތިބި ސިފައިން ދިގު މުއްދަތެއް ވަންދެން ކަނޑުމަތީގައި ކޮށްދީފައިވާ ޚިދުމަތްތަކަށް އޭނާ ތައުރީފް ކޮށްފައި ވެއެވެ.
އެމެރިކާ އަސްކަރިއްޔާގައި ބޭނުންކުރާ އެންމެ ބިޔަ ހަނގުރާމަމަތީ މަތިންދާ ބޯޓުތައް އުފުލާ އެއް މަނަވަރު ކަމަށްވާ އަބްރަހަމް ލިންކަންއަކީ، ހަނގުރާމައިގެ ތެރޭގައި އީރާނުގެ އެތައް ހަމަލާތަކެއް އަމާޒުކޮށްފައިވާ އުޅަނދެއް ކަމަށް އީރާނުން ބުނެފައި ވެއެވެ. ނަމަވެސް، އެ ވާހަކަތައް އެމެރިކާގެ ސެންޓްރަލް ކޮމާންޑުން ތަކުރާރުކޮށް ދޮގުކޮށްފައި ވެއެވެ.
އެކަމަކު، އެކިއެކި ފަރާތްތަކުން އާންމުކޮށްފައިވާ ވީޑިއޯތަކާއި، ފޮޓޯތަކުން އަބްރަހަމް ލިންކަންއަށް އީރާނުން ބޮޑެތި ގެއްލުންތައް ދީފައިވާކަން ހާމަވެފައި ވެއެވެ.
ކިޔުންތެރިންގެ ހިޔާލު