ހުޅުމާލޭ ދެވަނަ ފިޔަވަހީގެ އަމާން ޓަވަރުތައް ހިމެނޭ ސަރަހައްދަށް ގަވާއިދާ ހިލާފަށް ކުނި އަޅާ މީހުން ދެނެގަތުމަށް ސީސީޓީވީ ކެމެރާ ހަރުކުރުމުގެ މަސައްކަތް ކުރަމުންދާ ކަމަށާއި، އެފަދަ ފަރާތްތަކާމެދު ގާނޫނީ ފިޔަވަޅު އަޅާނެ ކަމަށް ފަހި ދިރިއުޅުން ކޯޕަރޭޝަނުން މިއަދު އިންޒާރު ދީފިއެވެ.
އެ ކޯޕަރޭޝަނުން މި އިންޒާރު ދީފައިވަނީ އަމާން ޓަވަރުތައް ކައިރިއަށް ގަވާއިދާ ހިލާފަށް ކުނި އެޅުން ބޮޑުވެ، އެ ސަރަހައްދަށް ޖަމާކޮށްފައިވާ 670 ޓަނުގެ ކުނި ނަގަން ޖެހުމާ ގުޅިގެންނެވެ.
އެފްޑީސީން އާންމުކުރި މައުލޫމާތުގައި ބުނީ، އަމާން ޓަވަރުތައް ހިމެނޭ ސަރަހައްދަކީ ސާފުތާހިރު އަދި ރައްކާތެރި މާހައުލަކަށް ހެދުމުގެ ގޮތުން އެ ސަރަހައްދު ސީސީޓީވީ މެދުވެރިކޮށް މޮނިޓަރު ކުރުމަށް ނިންމާފައިވާ ކަމަށެވެ.
ކެމެރާ މެދުވެރިކޮށް ގަވާއިދާ ހިލާފަށް ކުނި އަޅާ މީހުން ވަގުތުން ދެނެގަނެވޭނެ ކަމަށާއި، ކުނި އެޅުމުގެ އަމަލުތައް ހުއްޓުވުމަށް ކުރަންޖެހޭ ހުރިހާ މަސައްކަތެއް ކުރާނެ ކަމަށް އެ ކޯޕަރޭޝަނުން ވަނީ ފާހަގަކޮށްފައެވެ.
ވޭތުވެދިޔަ ނުވަ މަސްދުވަހުގެ ތެރޭގައި އެ ސަރަހައްދުން ކުނި ނައްތާލުމަށް 13.5 މިލިއަން ރުފިޔާ ހަރަދުވެފައިވާ ކަމަށް އެފްޑީސީން ކުރިން ހާމަކޮށްފައިވެއެވެ. މިހާ ބޮޑު ހޭދައެއް ކުރަންޖެހުނީ ކަނޑައެޅިފައިވާ އުސޫލުތަކާ ހިލާފަށް އާންމު ސަރަހައްދުތަކަށް ބައު ފަރުނީޗަރާއި އިމާރާތްކުރުމަށް ބޭނުންކުރާ ސާމާނު ފަދަ ތަކެތި އުކާލުމުގެ ސަބަބުންނެވެ.
ހުޅުމާލޭ ދެވަނަ ފިޔަވަހީގައި އާބާދީ އިތުރުވަމުންދާއިރު، ކުނި ވަކިނުކޮށް މަގުމައްޗަށް އުކާލުމުގެ މައްސަލަ ވަނީ ބޮޑުވެފައެވެ. މި މައްސަލަ ހައްލުކުރުމަށް އާންމުން ހޭލުންތެރިކުރުވައި، ކުނި ނެގުމުގެ ހިދުމަތްތައް މިއަދަށްވުރެ ހަރުދަނާކުރަންޖެހޭ ކަމަށް ގިނަ ބަޔަކު ދެކެއެވެ.
ކިޔުންތެރިންގެ ހިޔާލު