ފީފާގެ ރައީސް ޖިއާނީ އިންފަންޓީނޯ ދެކުނު އެމެރިކާގެ ތާއީދު ދަމަހައްޓަން ފަށައިފިއެވެ. ދެކުނު އެމެރިކާގެ ތާޢީދު ދަމަހައްޓަން ފަށާފައިމިވަނީ އިންފަންޓީނޯއަށް އޮތް ޔޫރަޕާއި ކޮންކާކަފް އަދި އޭޝިޔާގެ ގިނަ ގައުމުތަކެއް ތާއީދު ގެއްލުމުންނެވެ.
އިންފަންޓީނޯ ވަނީ މިހާރު ދެކުނު އެމެރިކާގެ ގައުމުތަކަށް ދަތުރު ކުރަން ފަށްޓަވާފައެވެ. މިގޮތުން އިއްޔެ އޭނާ ހުންނެވީ ކޮލޮމްބިއާގައެވެ. މިދަތުރުގެ ބޭނުނަމީ ދެކުނު އެމެރިކާގެ ތާއީދު އޭނާ އަށް އޮތްކަން ދެއްކުމާއި ގައުމުތައް ލައްވައި ރަސްމީކޮށް މީޑިއާ އަށް އެކަން އެންގުމެވެ. ދެކުނު އެމެރިކާގެ ގައުމުތަކުގެ ތެރެއިން އިންފަންޓީނޯ އަށް ތާއީދު އޮތްކަން އެންމެ ފުރަތަމަ އެންގީ ސަރަހައްދީ ޗެމްޕިއަން އާޖެންޓީނާ އެވެ. އަދި އޭނާގެ ދަތުރާ ދިމާކޮށް ކޮލޮމްބިއާއި ވަނީ ކުރިއަށް އޮތް ފީފާގެ އިންތިހާބުގައި ތާއީދު ކުރާނީ އޭނާ އަށް ކަމަށް މީޑިއާގައި ބުނެފަ އެވެ.
އިންފަންޓީނޯ ހަތަރުވަނަ ދައުރަކަށް ކުރިމަތިލައްވާއިރު އޭނާ އަށް ވަނީ އިތުބާރުގެ މައްސަލަ ކުރިމަތިވެފައެވެ. އެއީ ފީފާގެ ތެރެއިން ވިޔަފާރި ކުންފުންޏެއް ހަދައި އޭގެ 20 ޕަސެންޓް ހިއްސާ އެމެރިކާގެ ރައީސް ޑޮނަލްޑް ޓްރަމްޕާ ގާތް ގުޅުން އޮތް ފަރާތްތަކަށް ވިއްކާލުމަށް މަސައްކަތް ކުރުމުންނެވެ. މިއާއެކު ޔޫރަޕުން ވަނީ ފީފާގެ މުބާރާތްތައް ބޮއިކޮޓް ކުރަން ނިންމައިފަ އެވެ. އަދި އޭނާ އިސްތިއުފާ ދިނުމަށް ވެސް ވަނީ ގޮވާލާފައެވެ.
ޔޫރަޕާއި ކޮންކާކަފާއި އޭޝިޔާގެ ގިނަ ގައުމުތަކުން މިހާރު މަސައްކަތް ކުރަމުންދަނީ އޭނާގެ ބަދަލުގައި ފީފާގެ ރައީސްކަމަށް ކުރިމަތިލައްވާނެ ބޭފުޅަކު ހޯދުމަށެވެ.
ކިޔުންތެރިންގެ ހިޔާލު