ބ. އަަތޮޅު ކިހާދޫ ސިއްހީ މަރުކަޒުގެ އިމާރާތުގެ ޖާގަ އިތުރުކުރުމުގެ މަސައްކަތް އަންނަ އަހަރުގެ ތެރޭގައި ނިމި، އެ އިމާރާތް ބޭނުންކުރަން ފެށޭނެކަމަށް ސިއްހީ ކަންކަމާއި އާއިލާއާއި ދުޅަހެޔޮކަމާ ބެހޭ ވަޒީރު ގީލާ އަލީ ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ކެންދޫ ދާއިރާގެ މެންބަރު މައުރޫފު ޒާކިރު ކުރެއްވި ސުވާލަކަށް ޖަވާބުދާރީވެވަޑައިގަންނަވަމުން ވަޒީރު ވިދާޅުވީ، ކިހާދޫ ސިއްހީ މަރުކަޒުގެ ޖާގަ އިތުރުކުރުމަށް އެކްސްޓެންޝަން އިމާރާތެއް ގާއިމުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވައުދުފުޅާ އެއްގޮތަށް އެ މަސައްކަތް ކުރިއަށްދާ ކަމަށެވެ.
މަޖިލީހުގެ ތަޅުމުގައި ވާހަކަފުޅު ދައްކަވަމުން ވަޒީރު ފާހަގަކުރެއްވީ، އެ މަޝްރޫއު ކުންފުންޏަކާ ހަވާލުކުރެވި، މަސައްކަތަށް ބޭނުންވާ މީހުންނާއި ތަކެތި މިހާރު ކިހާދޫއަށް ފޮނުވާފައިވާ ކަމަށެވެ. ހަތް މަސްދުވަހުގެ ތެރޭގައި ނިންމާ ގޮތަށް ހަވާލުކުރި މި މަޝްރޫއުގެ މަސައްކަތް ނިމި، އަންނަ އަހަރުގެ ތެރޭގައި އައު އިމާރާތް ބޭނުންކުރަން ފެށޭނެ ކަމަށްވެސް ވަޒީރު ވިދާޅުވިއެވެ.
ކިހާދޫ ސިއްހީ މަރުކަޒުގެ މިހާރުގެ ހާލަތަށް އަލިއަޅުއްވާލައްވަމުން ވަޒީރު ވިދާޅުވީ، އެ މަރުކަޒުގައި މިވަގުތުވެސް ސޯޅަ މުވައްޒަފުން ހިދުމަތް ފޯރުކޮށްދެމުންދާ ކަމަށެވެ. އެ މުވައްޒަފުންގެ ތެރޭގައި އާންމު ބަލިތަކުގެ ޑޮކްޓަރެއްގެ އިތުރުން ނަރުހުންވެސް ހިމެނޭކަން އެކަމަނާ ފާހަގަކުރެއްވިއެވެ.
ރައްޔިތުންގެ ދުޅަހެޔޮކަން ކަށަވަރުކުރުމަށްޓަކައި ބަލިތައް ދެނެގަތުމަށް ހަދާ ތަހުލީލުތަކަކީ އެންމެ މުހިންމު އެއް ވަސީލަތް ކަމަށްވާތީ، އާންމު ބަލިތައް ދެނެގަތުމަށް ބޭނުންވާ ޓެސްޓުތައް ހެދޭނެ އިންތިޒާމު ކިހާދޫގައި ގާއިމުކޮށް، ލެބޯޓަރީގެ ހިދުމަތް މި ސަރުކާރުގެ ފުރަތަމަ ސަތޭކަ ދުވަހުގެ ތެރޭގައި ފެށިފައިވާކަން ވަޒީރު ހާމަކުރެއްވިއެވެ.
ވަޒީރު ގީލާ އަލީ ވިދާޅުވީ، ރައްޔިތުންގެ ސިއްހީ ރައްކާތެރިކަން ކަށަވަރުކުރުމަށްޓަކައި ބަލިތައް ތަހުލީލުކުރެވޭނެ ނިޒާމެއް ގާއިމުކުރުމަށް ހާއްސަ ސަމާލުކަމެއް ދެވިފައިވާ ކަމަށެވެ. އެގޮތުން ރަށުގައި ތިބެގެން އާންމު ބަލިތަކަށް ބޭނުންވާ ތޭރަ ވައްތަރެއްގެ ޓެސްޓު ޕޮއިންޓް އޮފް ކެއާގެ ތެރެއިން ހެދޭނެ އިންތިޒާމު ސަރުކާރުގެ ފުރަތަމަ ސަތޭކަ ދުވަހުގެ ތެރޭގައި ހަމަޖައްސާފައިވާ ކަމަށާއި، މިއީ މިހާތަނަށް އެއްވެސް ސަރުކާރަކުން އެ ރަށުގައި ގާއިމުކޮށްދީފައިވާ ހިދުމަތެއް ނޫން ކަމަށް ވަޒީރު ވިދާޅުވިއެވެ.
އާބާދީ ކުޑަ ރަށްރަށުންވެސް ލެބޯޓަރީގެ ހިދުމަތް ލިބެންޖެހޭނެ ކަމަށް ގަބޫލުކުރައްވައި، ރާއްޖޭގެ ټول ރަށްރަށުގައި ލެބޯޓަރީ ގާއިމުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާކަން ވަޒީރު ފާހަގަކުރެއްވިއެވެ. އަދި ކިހާދޫގައި ގާއިމުކުރެވޭ ލެބޯޓަރީއަށް ބޭނުންވާ މުވައްޒަފުން މި އަހަރުގެ ތެރޭގައި ހަމަޖެހިގެންދާނެ ކަމަށްވެސް ވިދާޅުވިއެވެ.
މީގެއިތުރުން ނިމުނު އަހަރު ކިހާދޫއަށް އެމްބިއުލާންސެއް ފޯރުކޮށްދީ، އެ ހިދުމަތް މިހާރު ފެށިފައިވާކަން ވަޒީރު ފާހަގަކުރެއްވިއެވެ. އެރަށުގައި އައު ހިދުމަތްތައް ތައާރަފުކުރެވި، އެ ކަންކަމުގެ ފަސޭހަކަން ރައްޔިތުންނަށް ލިބެމުންދާކަމަށްވެސް ވަޒީރު ވިދާޅުވިއެވެ.
ކިޔުންތެރިންގެ ހިޔާލު