2028 ވަނަ އަހަރު އޮންނަ ކޯޕާ އެމެރިކާ ފުޓްބޯޅަ މުބާރާތުގައި އާޖެންޓީނާގެ ގައުމީ ޓީމަށް ލިއޮނެލް މެސީ ކުޅޭނެތޯ ނިންމާނީ އޭނާ އަމިއްލައަށްކަމަށް އެ ގައުމުގެ ފުޓްބޯޅަ އެސޯސިއޭޝަނުން ބުނެފިއެވެ. އެ އެސޯސިއޭޝަންގެ ރައީސް ވަނީ ގައުމީ ޓީމާއިއެކު މެސީގެ ވިސްނުން ހުރި ގޮތެއް އަދި އެނގިފައިނުވާ ކަމަށް ބުނެފައެވެ. އަދި އެކަމާއި ގުޅޭ ގޮތުން އެސޯސިއޭޝަނުން އެއްވެސް ޕްރެޝަރެއް ނުކުރާނެ ކަމަށެވެ.
މިހާރު އުމުރުން 39 އަހަރުގެ މެސީ ވަނީ 2022 ވަނަ އަހަރު ގަތަރުގައި ބޭއްވި ފީފާ ވޯލްޑްކަޕްގެ ޗެމްޕިއަންކަން އާޖެންޓީނާ އަށް ހޯދައިދިނުމުގައި މުހިންމު ދައުރެއް އަދާކޮށްފައެވެ. މީގެ އިތުރުން މި އަހަރު ބޭއްވި ފީފާ ވޯލްޑްކަޕްގެ ފައިނަލަށް އާޖެންޓީނާ ގެންގޮސްދިނުމުގައިވެސް މުހިންމު ދައުރެއް އަދާކޮށްފައިވެއެވެ. މެސީ ވަނީ 2021 އަދި 2024 ވަނަ އަހަރުގެ ކޯޕާ އެމެރިކާގެ ޗެމްޕިއަންކަންވެސް އާޖެންޓީނާ އާއިއެކު ހޯދާފައެވެ.
އެސޯސިއޭޝަންގެ ރައީސް ބުނީ މެސީ ދަނޑު މަތިން ފެނުމުން އެކަމާ އުފާކުރަނީ އޭނާ އެކަނި ނޫން ކަމަށާއި އެއީ ފުޓްބޯޅަ އަށް ލޯބިކުރާ އެންމެނަށްވެސް އުފާވެރިކަން ގެނެސްދޭ ކަމެއް ކަމަށެވެ. އާޖެންޓީނާގެ ގައުމީ ޓީމުގެ ކޯޗު ކަމުގެ މަގާމަށް ބަދަލުތަކެއް ގެނައުމުގެ ވިސްނުމެއް ނުގެންގުޅޭ ކަމަށާއި އޭނާގެ ވިސްނުމަކީ އަދިވެސް ސްކެލޯނީ އާއި މަޝްވަރާކޮށް އޭނާ އެ މަގާމުގައި ބެހެއްޓުން ކަމަށްވެސް އާޖެންޓީނާގެ ފުޓްބޯޅަ އެސޯސިއޭޝަންގެ ރައީސް ވަނީ ބުނެފައެވެ.
ކިޔުންތެރިންގެ ހިޔާލު