މި މަހުގެ ފަހުކޮޅު ބޭއްވުމަށް ހަމަޖެހިފައިވާ ބަލަންޑޯ އެވޯޑު ހަފުލާގައި ބައިވެރިވާނެކަން، އާޖެންޓީނާގެ ކުރީގެ ކެޕްޓަން ލަޔޮނަލް މެސީ ކަށަވަރުކޮށްދީފިއެވެ.
ބަލަންޑޯ އެވޯޑު ރެކޯޑް އަދަދަކަށް، އަށް ފަހަރު ހޯދާފައިވާ މެސީ މި ހަފުލާގައި ބައިވެރިވާއިރު، މިފަހަރު ވެސް މި އެވޯޑަށް ވާދަކުރާ ކުޅުންތެރިންގެ ތެރޭގައި އޭނާ ހިމެނެއެވެ. ދުނިޔޭގެ ގައުމީ ޓީމުތަކުގެ ކޯޗުންނާއި ކެޕްޓަނުންގެ އިތުރުން ހޮވާލެވޭ ނޫސްވެރިންގެ ވޯޓުން ކަނޑައަޅާ މި އިނާމަށް، މެސީއާ އެކު ވާދަކުރާނެ ކަމަށް ބެލެވިފައިވަނީ ބަޔާން މިއުނިކަށް ކުޅޭ އިނގިރޭސި ކެޕްޓަން ހެރީ ކޭން، ރެއާލް މެޑްރިޑަށް ކުޅޭ ފްރާންސްގެ ކެޕްޓަން ކީލިއަން އެމްބާޕޭ، އަދި ސްޕޭން އަދި ބާސެލޯނާގެ ފޯވަޑް ލަމީން ޔަމާލެވެ. ގިނަ ފަރާތްތަކުގެ ރޭންކިންތަކުން ފެންނަ ގޮތުގައި މިފަހަރު މެސީ ހިމެނެނީ މި ކުޅުންތެރިންގެ ފަހަތުގައެވެ.
އިނގިރޭސިވިލާތުގެ ލަންޑަނުގައި މި މަހުގެ 26 ގައި ބާއްވާ މި އެވޯޑު ހަފުލާގައި މެސީ ބައިވެރިވުމަކީ، ބަލަންޑޯ އެވޯޑު އިންތިޒާމުކުރާ ފްރާންސް ފުޓުބޯޅަ ޖަމްއިއްޔާއިން އޭނާގެ ކާމިޔާބީތަކަށް އަގުވަޒަންކުރާ ކަމެއް ކަމަށް ބެލެވެއެވެ. މެސީ ބުނެފައިވާ ގޮތުގައި އޭނާ މި ހަފުލާއަށް ދާނީ އޭނާގެ އަނބިކަނބަލުންނާއި ތިން ކުދިންނާ އެކުއެވެ. މިއީ ވެސް އެވޯޑު ހަފުލާގެ ހާއްސަކަން އިތުރުކުރާ ކަމެކެވެ. ނަމަވެސް، މެސީއަށް ސުޕަރ ބަލަންޑޯ އެވޯޑު ދިނުމާ ބެހޭ ގޮތުން ފްރާންސް ފުޓުބޯޅައިން އެއްވެސް އެއްޗެއް ހާމަކޮށްފައެއް ނުވެއެވެ. އެހެންނަމަވެސް މިއީ މީގެ ކުރިން މަޝްވަރާކުރެވިފައިވާ ކަމެކެވެ.
މެސީ ވަނީ މިދިޔަ ޖުލައި މަހު ނިމުނު ވޯލްޑް ކަޕަށް ފަހު، އާޖެންޓީނާގެ ގައުމީ ޓީމަށް ކުޅުން ހުއްޓާލާފައެވެ. އުމުރުން 39 އަހަރުގެ މި ފޯވަޑް ވަނީ ކެރިއަރުގައި ތިން ފަހަރު ވޯލްޑް ކަޕް ފައިނަލް ކުޅެ، 2022 ވަނަ އަހަރު ބޭއްވި މުބާރާތުގެ ތަށި އުފުލާލާފައެވެ. ބާސެލޯނާގައި ކެރިއަރުގެ ގިނަ ދުވަސްތަކެއް ހޭދަކުރި މެސީ ވަނީ އާޖެންޓީނާގެ ޤައުމީ ޓީމަށް 208 މެޗު ކުޅެ، 126 ގޯލު ޖަހައިދީފައެވެ.
ބާސެލޯނާއިން 2021 ވަނަ އަހަރު ފްރާންސްގެ ޕީއެސްޖީއަށް ބަދަލުވި މެސީ، އެއަށް ދެ އަހަރު ފަހު، މިހާރު ކުޅެމުންދަނީ އެމެރިކާގެ އިންޓަރ މިއާމީއަށެވެ.
ކިޔުންތެރިންގެ ހިޔާލު