ވޯލްޑް ޓްރެވަލް އެވޯޑްސް 2026 ގެ ޝަރަފުވެރި ދެ ކެޓަގަރީއަކުން ވެލާނާ އިންޓަރނޭޝަނަލް އެއަރޕޯޓާއި މާމަހި އެގްޒެކެޓިވް ލައުންޖް ނޮމިނޭޓްވެފައިވާކަން މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން އިއުލާނުކޮށްފިއެވެ.
އެމްއޭސީއެލްއިން ބުނީ ވެލާނާ އިންޓަނޭޝަނަލް އެއާޕޯޓް ނޮމިނޭޓްވެފައިވަނީ “އިންޑިއަން އޯޝަންސް ލީޑިން އެއާޕޯޓް 2026” ގެ މަގާމަށްކަމަށެވެ. މީގެ ކުރިން 12 ފަހަރު މި ލަގަބު ހޯދާފައިވާ މި އެއާޕޯޓަށް މިފަހަރު ލިބުނު ނޮމިނޭޝަނަކީ، އިންޑިއާ ކަނޑުގެ ސަރަހައްދުގައި ފާހަގަކޮށްލެވޭ އެންމެ ކުރިއަރާފައިވާ އެއް އެއާޕޯޓުގެ ގޮތުގައި މި އެއާޕޯޓުން ދަމަހައްޓަމުންދާ މަގާމު ރަމްޒުކޮށްދޭ ކަމެއްކަން އެ ކުންފުނިން ފާހަގަކުރެއެވެ.
މާމަހި އެގްޒެކެޓިވް ލައުންޖުގައި ފަތުރުވެރިއަކު މަޑުކޮށްލައިގެން. ފޮޓޯ: އެމްއޭސީއެލް
އަދި މާމަހި އެގްޒެކެޓިވް ލައުންޖް ނޮމިނޭޓްވެފައިވަނީ “އިންޑިއަން އޯޝަންސް ލީޑިން އެއާޕޯޓް ލައުންޖް 2026” ގެ މަގާމަށްކަމަށާއި މިއީ ފަސިންޖަރުންނަށް ފެންވަރު ރަނގަޅު އަދި އަރާމު ހިދުމަތްތަކެއް ފޯރުކޮށްދިނުމަށް އެ ލައުންޖުން ކުރަމުންދާ މަސައްކަތްތައް ބަލައިގަންނަކަމުގެ ހެއްކެއްކަމަށް އެމްއޭސީއެލް އިން ބުންޏެވެ.
ނަވާރަ ސަތޭކަ ނުވަދިހަ ތިން ވަނަ އަހަރު އުފެދުނު ވޯލްޑް ޓްރެވަލް އެވޯޑްސްއަކީ ދަތުރުފަތުރާއި، ފަތުރުވެރިކަމުގެ ދާއިރާގައި ދުނިޔޭގެ ފެންވަރުގައި ދެވޭ އެންމެ ޝަރަފުވެރި އެއް އެވޯޑެވެ.
އެއާޕޯޓުގެ ކައުންޓަރަކުން ފަސިންޖަރަކަށް ހިދުމަތްދެނީ. ފޮޓޯ:އެމްއޭސީއެލް
މި ނޮމިނޭޝަންތަކަކީ އެއާޕޯޓުގެ ހިދުމަތްތައް ތަރައްގީކޮށް، ފަސިންޖަރުންގެ ތަޖުރިބާ އިތުރަށް ފުރިހަމަކުރުމަށާއި، ދިވެހިރާއްޖޭގެ މައި ދޮރާށީގެ ގޮތުގައި ވެލާނާ އިންޓަނޭޝަނަލް އެއާޕޯޓުގެ މަގާމު ވަރުގަދަކުރުމަށް އެމް.އޭ.ސީ.އެލް އިން ކުރަމުންދާ މެދުނުކެނޑި މަސައްކަތްތަކުގެ ހެއްކެއްކަމަށް އެމްއޭސީއެލް އިން ބުންޏެވެ.
ކިޔުންތެރިންގެ ހިޔާލު