ފުވައްމުލައް ސިޓީގެ އެކި ރުއްރުކުން އެ ތަކެތީގެ ވެރިފަރާތްތަކަށް ނޭނގި ބާލާފައި ހުރި ގިނަ އަދަދެއްގެ ކުރުނބާ އެ ސިޓީގެ ފުލުހުންގެ އިދާރާގެ ބެލުމުގެ ދަށަށް ގެންގޮސް، އޭގެ ވެރިފަރާތްތައް ހޯދުމުގެ މަސައްކަތް ފުލުހުން ފަށައިފިއެވެ.
މި މައްސަލައާ ގުޅިގެން ފުވައްމުލައް ސިޓީގެ ފުލުހުންގެ އިދާރާއިން މިއަދު އާންމުކުރި މައުލޫމާތުތަކުގައި ބުނެފައިވަނީ، އެ ސިޓީގެ އެކި ސަރަހައްދުތަކުގައި ހުރި ރުއްރުކުން އޭގެ ވެރިންނަށް ނޭނގި ބާލާފައި ހުރި ގިނަ އަދަދެއްގެ ކުރުނބާ އިހާތަކެއް ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. ފުލުހުން ސޯޝަލް މީޑިއާގައި ހިއްސާކޮށްފައިވާ ފޮޓޯތަކުން ފެންނަ ގޮތުގައި، މިގޮތަށް ފުލުހުންގެ ބެލުމުގެ ދަށަށް ގެނައި ކުރުނބާ އިހާތައް ހުރީ އެ ސިޓީގެ ފުލުހުންގެ އިދާރާގެ ކޮރިޑޯގައި ތަރުތީބުން އަތުރައިފައެވެ.
ފުލުހުންގެ އިދާރާއިން ވަނީ އެ ކުރުނބާތަކުގެ ވެރިފަރާތްތަކުން ވީ އެންމެ އަވަހަކަށް ފުލުހުންގެ އިދާރާއަށް ހާޒިރުވެ، އެ ތަކެއްޗާ ހަވާލުވުމަށާއި އަދި އެއާ ގުޅުންހުރި މައްސަލަތައް ރަސްމީކޮށް ހުށަހެޅުމަށް އެދިފައެވެ. މިއީ ވެރިންނަށް ނޭނގި ނުވަތަ ވަގަށް ނަގައިގެން ބާލާފައިވާ ތަކެތި ކަމަށް ބެލެވޭތީ، މިފަދަ އަމަލުތައް ހިންގާ ފަރާތްތައް ހޯދައި ގާނޫނީ ފިޔަވަޅު އެޅުމަށްޓަކައި ވެރިފަރާތްތަކުގެ އެއްބާރުލުން ބޭނުންވާ ކަމަށް ފުލުހުން ފާހަގަކުރެއެވެ.
މިފަދަ ހާދިސާތަކަކީ ރާއްޖޭގެ އެކި ރަށްރަށުގައި ދަނޑުވެރިކަމާއި ރަށްފުށުގެ އުފެއްދުންތަކަށް އަމާޒުކޮށްގެން ހިނގަމުންދާ ވައްކަމުގެ މައްސަލަތަކުގެ ތެރެއިން އާންމުކޮށް ފެންމަތިވާ ކަންކަމެވެ. މީގެ ކުރިން އައްޑޫ ސިޓީގައި ވެސް ވަގަށް ނަގައިފައިވާ ކަމަށް ބެލެވޭ ކެޔޮގަނޑުތަކަކާއި ކުރުނބާތަކެއް ހޯދައި، އެ ތަކެތީގެ ވެރިފަރާތްތައް ހޯދުމަށް ހިތަދޫ ފުލުހުންގެ އިދާރާއިން މީގެ ކުރިން އިއުލާނުކޮށްފައިވެއެވެ. ފުލުހުން ދަނީ މިފަދަ މައްސަލަތައް ހުއްޓުވުމަށާއި، އާންމުންގެ މުދާ ރައްކާތެރިކުރުމަށްޓަކައި ހާއްސަ ސަމާލުކަމެއްދީގެން މަސައްކަތްތައް ކުރަމުންނެވެ.
ކިޔުންތެރިންގެ ހިޔާލު