ފުލުހުންގެ ބެލުމުގެ ދަށުގައި ހުރި 30،000 ޑޮލަރު ހަލާކުވި މައްސަލައަކާ ގުޅިގެން، އެކަމުގައި އިހުމާލުވި ކަމަށް ތުހުމަތުކުރެވޭ ފުލުހަކު ވަޒީފާއިން ވަކިކުރުމަށް ފުލުހުންގެ ޑިސިޕްލިނަރީ ބޯޑުން ލަފާދީފިއެވެ.
މި މައްސަލައަކީ 2019 ވަނަ އަހަރުގެ ސެޕްޓެމްބަރު މަހުގެ 15 ވަނަ ދުވަހު ހުށަހެޅުނު މައްސަލައަކާ ގުޅިގެން ފުލުހުންގެ ބެލުމުގެ ދަށަށް ގެނައި ފައިސާތަކެއް ހަލާކުވި މައްސަލައެކެވެ. މި ފައިސާތައް ހުރީ ފުލުހުންގެ ފައިނޭންސް ޑިޕާޓްމަންޓުގެ ބެލުމުގެ ދަށުގައެވެ. މިދިޔަ އަހަރުގެ އޯގަސްޓު މަހުގެ 13 ވަނަ ދުވަހު ފައިސާތައް ހުރި ކޮތަޅެއްގެ ތެރެއިން ބައެއް ފައިސާ ހަލާކުވެފައި ހުރިކަން ފާހަގަވުމުން، ފުލުހުންގެ ކްރިމިނަލް އިންވެސްޓިގޭޝަން ކޮމާންޑުން ވަނީ އެކަން ތަހުގީގުކުރަން ފަށާފައެވެ.
ފުލުހުންގެ ޕްރޮފެޝަނަލް ސްޓޭންޑާޑްސް ކޮމާންޑުން މި މައްސަލަ ތަހުގީގުކުރުމަށްފަހު، ފައިސާތަކާ ހަވާލުވެ ހުރި މުވައްޒަފުގެ އިހުމާލު އޮތްކަން ވަނީ ފާހަގަކުރެވިފައެވެ. މި މައްސަލަ ބެލުމަށްފަހު، ފުލުހުންގެ ޑިސިޕްލިނަރީ ބޯޑުން މި މަހުގެ ހަތް ވަނަ ދުވަހު ނިންމާފައިވަނީ އެ ފުލުސް މީހާ ވަޒީފާއިން ވަކިކުރުމަށެވެ. އަދި އިސްތިއުނާފު މަރުހަލާ ނިމެންދެން އެ މުވައްޒަފު ވަޒީފާއިން ސަސްޕެންޑުކުރުމަށް ވެސް އެ ބޯޑުން ވަނީ ލަފާދީފައެވެ.
ފައިސާ ހަލާކުވި ގޮތާއި އެ މައްސަލައާ ގުޅޭ އިތުރު ތަފުސީލެއް ފުލުހުންގެ މުއައްސަސާއިން ހާމަކޮށްފައިނުވެއެވެ. ވަޒީފާއިން ވަކިކުރަން ނިންމި ފުލުސް މީހާއާ ގުޅޭ އެއްވެސް މައުލޫމާތެއް ވެސް ފުލުހުން ހިއްސާކޮށްފައެއް ނުވެއެވެ.
ކިޔުންތެރިންގެ ހިޔާލު