އީރާނާ ވާހަކަ ދައްކަމުން ގެންދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް އަނެއްކާވެސް ބުނެފިއެވެ.
ވައިޓް ހައުސްގައި ނޫސްވެރިންނާ ވާހަކަ ދައްކަމުން އެމެރިކާގެ ރައީސް ބުނީ، އެމެރިކާއިން އީރާނާ ވާހަކަ ދައްކަމުން ގެންދާ ކަމަށާއި، ވާހަކަތަކުގައި އީރާނު ވަރަށް ސީރިއަސް ކަމަށެވެ.
ހަމަ އެނޭވާގައި އެމެރިކާގެ ރައީސް ބުނީ، އީރާނާ ދެކޮޅަށް ހަނގުރާމަ ފަށަން އެމެރިކާ އޮތީ ފުރިހަމަ ތައްޔާރީގައި ކަމަށެވެ.
ނޫސްވެރިން ޓްރަމްޕާ ސުވާލުކުރީ، އިސްރާއީލާ ގުޅިގެން އެމެރިކާއިން އީރާނާ ދެކޮޅަށް އަނެއްކާވެސް ހަނގުރާމަ ފަށަން ޓްރަމްޕް ދީފައިވާ އިންޒާރާ ގުޅޭގޮތުންނެވެ.
ޓްރަމްޕް ބުނީ، އީރާނާ ވާހަކަ ދައްކަމުން ގެންދާތީ، އޭނާ އިންޒާރު ކުރިގޮތަށް އީރާނަށް ހަމަލާދޭން ނުޖެހިދާނޭ ކަމަށެވެ. އެއީ، އެއްބަސްވުމެއް ހެދުމަށް އީރާނުން ވަރަށް ބޮޑަށް ބޭނުންވެގެން އުޅޭތީ ކަމަށްވެސް އެމެރިކާގެ ރައީސް ބުނެފައި ވެއެވެ.
އެމެރިކާގެ ފަރާތުން އީރާނާ ވާހަކަ ދައްކަނީ ކޮންބައެއްތޯ ސުވާލު ކުރުމުން ޓްރަމްޕް ބުނީ، ނައިބް ރައީސް ޖޭޑީ ވޭންސްއާއި، ޚާރިޖީ ވަޒީރު މާކޯ ރޫބިއޯ ކަމަށެވެ. އިތުރު ތަފްސީލެއް ނުދެއެވެ.
އެމެރިކާގެ ރައީސް މިހެން ބުނިނަމަވެސް، އީރާނުން ތަކުރާރުކޮށް ބުނެފައިވަނީ، އެމެރިކާއިން އީރާނުގެ ރަށްތަކަށް ވައިގެ ހަމަލާތައް ދެމުންގެންދާތީ، އެމެރިކާއާ އެއްވެސް ވާހަކައެއް ނުދައްކާނޭ ކަމަށެވެ.
ހަމަލާތައް ހުއްޓާލުމަށް ވެފައިވާ އެއްބަސްވުމާއި އަދި އީރާނާއި އެމެރިކާއިން ސޮއިކުރި އެމްއޯޔޫ އުވާލީވެސް އެމެރިކާގެ ރައީސެވެ.
ގަތަރު މެދުވެރިކޮށް އެމެރިކާއިން ހުށަހެޅި އައު ހުށަހެޅުމަށްވެސް އީރާނުވަނީ ނޫނެކޭ ބުނެފައެވެ. އިރާގުގެ ބޮޑުވަޒީރު އަލީ އަލް ޒައިދީ މެދުވެރިކޮށް އެމެރިކާއިން ހުށަހެޅި ހުށަހެޅުމާވެސް އީރާނުވަނީ ދެކޮޅު ހަދާފައެވެ.
އީރާނާ ދެކޮޅަށް ފުރިހަމަ ހަނގުރާމައެއް ފެށުމަށް އިންޒާރު ކުރުމަށްފަހު، އީރާނާ ވާހަކަ ދައްކަމުން ގެންދާ ކަމަށް އެމެރިކާގެ ރައީސް މި ހާމަކުރީ، ސަރަހައްދުގައި ހުރި އެމެރިކާގެ އެއްވެސް ތަނެއް އީރާނުގެ ރައްދު ހަމަލާތަކުން ސަލާމަތް ނުވާނޭ ކަމަށް ބުނެ އީރާނުން ވަރުގަދަ އިންޒާރުތަކެއް ކޮށްފައި ވަނިކޮށެވެ. އީރާނުގެ ރައްދު ހަމަލާތައް އަމާޒުކުރާނޭ ތަންތަނުގެ ލިސްޓެއްވެސް އީރާނުގެ އިންގިލާބީ ލަޝްކަރުން ހާމަކޮށްފައި ވަނިކޮށެވެ.
ކިޔުންތެރިންގެ ހިޔާލު