ކ. ތުލުސްދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިސްނެންގެވުމާއެކު، ކަރަންޓަށް ހޭލުންތެރިކުރުވުމާއި އާދައިގެ މައްސަލަތައް ހައްލުކުރުމުގެ ހުނަރު ދަސްކޮށްދިނުމަށް ސްޓެލްކޯއިން އެ ރަށުގެ ކަނބަލުންނަށް ހާއްސަ ތަމްރީނު ޕްރޮގްރާމެއް ހިންގައިފިއެވެ.
މި ވޯކްޝޮޕް ކުރިއަށް ގެންގޮސްފައިވަނީ ސްޓެލްކޯއިން ތުލުސްދޫގައި ގާއިމުކޮށްފައިވާ ސްޓޭޓް ޔުޓިލިޓީ ސްކިލްސް އެކެޑަމީގައެވެ. މިދިޔަ ހަފުތާ ބަންދުގައި ކުރިއަށްގެންދިޔަ މި ޕްރޮގްރާމަށް ދީފައިވާ ނަމަކީ އެނާޖީ އެވެއާނެސް އެންޑް އިލެކްޓްރިކް ސްކިލްސް ވޯކްޝޮޕް ފޯ ވިމެން އެވެ. މިއީ ގޭބީސީތަކުގައި ދިމާވާ ކަރަންޓުގެ ކުދި މައްސަލަތައް އަމިއްލައަށް ރައްކާތެރިކަމާއެކު ހައްލުކުރަން ދަސްކޮށްދިނުމަށާއި، ހަކަތަ އިގުތިސާދުކުރާނެ ގޮތްތަކަށް އަހުލުވެރިކުރުވުމުގެ މަގުސަދުގައި ހިންގި ވޯކްޝޮޕެކެވެ.
މި ތަމްރީނުތަކުގެ ސަބަބުން ކަނބަލުންނަށް ކަރަންޓުގެ ކަންކަމުގައި އަމިއްލައަށް އިތުބާރާއެކު ފިޔަވަޅުތައް އެޅުމުގެ ގާބިލުކަން ލިބިގެންދާނެކަމަށް ސްޓެލްކޯއިން ހާމަކޮށްފައިވެއެވެ. އަދި ހަކަތަ ބޭނުންކުރާ މިންވަރު މަދުކޮށް، ކަރަންޓު ބިލަށް ކުރާ ހޭދަ ކުޑަކުރުމަށް ބޭނުންވާ މުހިންމު މައުލޫމާތުތައް ބައިވެރިންނަށް ވަނީ ފޯރުކޮށްދީފައެވެ. މީގެ އިތުރުން ރައްކާތެރިކަމުގެ ފިޔަވަޅުތަކާއި ކަރަންޓު އާލާތްތައް ރަނގަޅު ގޮތުގައި ބޭނުންކުރާނެ ގޮތުގެ އަމަލީ ތަޖުރިބާވެސް މި ވޯކްޝޮޕްގެ ތެރެއިން ވަނީ ހިއްސާކޮށްފައެވެ.
ތުލުސްދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީން އިސްނަގައިގެން ފެށި މި މަސައްކަތަކީ މުޖުތަމައުގައި އަންހެނުން ބާރުވެރިކުރުވުމަށް އެޅުނު މުހިންމު ފިޔަވަޅެއްކަން ފާހަގަކުރެވެއެވެ. ސްޓެލްކޯގެ އަމާޒަކީ މިފަދަ ޕްރޮގްރާމްތައް މެދުވެރިކޮށް ރައްޔިތުން ހޭލުންތެރިކުރުވައި، ފަންނީ ހުނަރުތައް މުޖުތަމައުގެ އެކި ފަރާތްތަކަށް ފޯރުކޮށްދިނުމެވެ. މިފަދަ ތަމްރީނުތަކުގެ ސަބަބުން ރައްޔިތުންނަށް ދިރިއުޅުމުގައި ގިނަގުނަ ފަސޭހަތަކެއް ލިބިގެންދާނެކަމަށް އެ ކުންފުނިން ދެކެއެވެ.
ކިޔުންތެރިންގެ ހިޔާލު