މާލޭގައި ހިންގި ޚާއްޞަ އޮޕަރޭޝަނެއްގައި، ގަވާއިދާ ޚިލާފަށް ބަނގުރާ ގެންގުޅެ އޭގެ ވިޔަފާރިކުރާކަމުގެ ތުހުމަތުގައި ބަންގްލަދޭޝްއަށް ނިސްބަތްވާ ދެ މީހަކު ފުލުހުން ހައްޔަރުކޮށްފިއެވެ.
ފުލުހުންގެ ކައުންޓަރ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓް ގުޅިގެން ހޮނިހިރު ދުވަހު މާލޭގައި ވަނީ ޚާއްޞަ އޮޕަރޭޝަނެއް ހިންގާފައެވެ. މި އޮޕަރޭޝަނަކީ ބިދޭސީންތަކެއް ބަނގުރަލުގެ ވިޔަފާރިކުރާކަމަށް ފުލުހުންނަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެކެވެ. މި އޮޕަރޭޝަންގައި އެ މީހުން ދިރިއުޅޭ އެޕާޓްމަންޓް ބަލައިފާސްކުރިއިރު، އެތަނުން ބާރަ ފުޅި ބަނގުރާ ފެނިފައިވާކަމަށް ފުލުހުން ވަނީ ހާމަކޮށްފައެވެ.
މި މައްސަލައާ ގުޅިގެން ހައްޔަރުކޮށްފައިވަނީ އުމުރުން އެކާވީސް އަހަރުގެ އެމްޑީ ސިއަމް އަހްމަދާއި ތިރީސް ފަސް އަހަރުގެ ރޮބެލް މިއަހް ނަމަކަށް ކިޔާ ދެ މީހުންނެވެ. މި ދެ މީހުންނަކީވެސް ބަންގްލަދޭޝްގެ ރައްޔިތުންނެވެ. ފުލުހުން މިހާރު ދަނީ މި މައްސަލަ އިތުރަށް ތަހުގީގުކުރަމުންނެވެ. އަދި މިކަމުގައި އިތުރު ބަޔަކު ޝާމިލުވޭތޯ ބެލުމުގެ މަސައްކަތްވެސް ތަހުގީގުގެ ތެރެއިން ކުރިއަށްދާނެއެވެ.
މި މައްސަލައިގެ ފުލުހުންގެ އިޖުރާއަތްތައް ފުރިހަމަކުރުމަށްފަހު، މި ދެ މީހުންނާމެދު އިމިގްރޭޝަންގެ ޤާނޫނުގެ ދަށުން ފިޔަވަޅު އެޅުމަށްޓަކައި މިހާރު ވަނީ މޯލްޑިވްސް އިމިގްރޭޝަނާ ހަވާލުކޮށްފައެވެ. ފަހަކަށް އައިސް ރާއްޖޭގައި ބަނގުރަލުގެ ވިޔަފާރިކުރާކަމުގެ ތުހުމަތުގައި ބިދޭސީން ހައްޔަރުކުރުން ވަނީ އާންމުވެފައެވެ. މީގެ ތެރޭގައި ގިނަ އަދަދަކަށް ބަންގްލަދޭޝްގެ ރައްޔިތުން ހިމެނޭކަން ކަމާބެހޭ ފަރާތްތަކުން ފާހަގަކުރެއެވެ.
ކިޔުންތެރިންގެ ހިޔާލު