މާލޭގެ ބޮޑުތަކުރުފާނު މަގު، ދަރުބާރުގޭ ކައިރީގައި މިއަދު ހަވީރު ހިނގި ނުރައްކާތެރި އެކްސިޑެންޓުގައި އެ މީހާ ނިޔާވީ 30 ޓަނުގެ ބޮޑު ޓްރެއިލަރު ލޮރީއެއްގެ ދަށުވެގެން ކަމަށް ފުލުހުން ބުނެފިއެވެ.
މި ނުރައްކާތެރި ހާދިސާގައި މަރުވެފައިވަނީ މާލެ ސިޓީގެ ހުޅުމާލެ ގޯތި ނަންބަރު 20054 ގްރީންޕީކް، އިބްރާހީމް ނާޞިޙު އެވެ. ފުލުހުން މައުލޫމާތު ދީފައިވާ ގޮތުގައި، މި ހާދިސާ ހިނގުމާއެކު އޭނާ އައިޖީއެމްއެޗަށް ގެންދެވުނެވެ. ނަމަވެސް ހޮސްޕިޓަލަށް ގެންދިޔައިރު ވެސް އޭނާ ވަނީ މަރުވެފައެވެ.
މިއަދު ހަވީރު 15:57 ހާއިރު ހިނގި މި އެކްސިޑެންޓާ ގުޅިގެން ފުލުހުން ކުރިއަށްގެންދާ ތަހުގީގުގެ ފުރަތަމަ މައުލޫމާތުތަކުން ދައްކާ ގޮތުގައި، އިބްރާހީމް ނާޞިޙު މަރުވާން މެދުވެރިވީ ޓްރެއިލާ ލޮރީއެއްގެ ދަށުވުމުގެ ސަބަބުންނެވެ. އެހެންނަމަވެސް، އޭނާ ލޮރީގެ ދަށުވާން މެދުވެރިވީ ސީދާ އެ އުޅަނދުގައި ޖެހިގެން ކަމަށް މިހާތަނަށް ބެލިބެލުމުން ފާހަގަކުރެވިފައި ނުވާކަމަށް ފުލުހުން ބުނެފައިވެއެވެ. މި ހާދިސާ ހިނގަން މެދުވެރިވި އަސްލު ސަބަބު ދެނެގަތުމަށް ފުލުހުން ދަނީ މައްސަލަ އިތުރަށް ތަހުގީގު ކުރަމުންނެވެ.
މި ހާދިސާ ހިނގި ވަގުތަކީ އޮފީސްތައް ނިމިގެން ގިނަ ބަޔަކު ހުޅުމާލެއަށް ދަތުރުކުރަމުންދިޔަ ވަގުތު ކަމަށްވުމާއެކު، ދަރުބާރުގެ ސަރަހައްދުގައި ޓްރެފިކް ވަރަށް ބޮޑަށް ބާރުބޮޑުވެގެން ދިޔައެވެ. ބޮޑުތަކުރުފާނު މަގަކީ ބަސް ދަތުރުތަކަށް ވެސް ބޭނުންކުރާ މައި މަގެއް ކަމުން، އާންމު ދަތުރުފަތުރަށް ވަރަށް ބޮޑެތި ދަތިތަކަކާ ކުރިމަތިލާން ޖެހުނެވެ.
ކިޔުންތެރިންގެ ހިޔާލު