އެމެރިކާ ސިފައިން އީރާނަށް ވައިގެ ހަމަލާތައް ދެމުންގެންދާތީ، އީރާނުންވެސް ރައްދުގައި ސަރަހައްދުގައި ހުރި އެމެރިކާގެ އަސްކަރީ ބޭސްތަކަށް ހަމަލާތައް ދެމުން އެބަ ގެންދެއެވެ.
އީރާނުން އެމެރިކާގެ ބޭސްތަކަށް ހަމަލާ ދެމުންގެންދަނީ ބެލިސްޓިކް މިސައިލާއި ޑްރޯން ބޭނުންކޮށްގެންނެވެ.
ރޭގައި އީރާނުގެ އެތައް ސިޓީއަކަށް ދިން އުދުވާނީ ހަމަލާތަކަށްފަހު އެމެރިކާ ސިފައިން މިއަދު ހަމަލާތައް ދީފައިވަނީ ބަންދަރު އައްބާސްއަށާއި، ބުޝެހްރް އަދި ޝީރާޒަށެވެ.
ޝީރާޒަށް ދިން ހަމަލާތަކަށްފަހު އެ ރަށުގައި ހުރި އިލެކްޓްރޯކިކްސް އިންޑަސްޓްރީޒް ކޮމްޕްލެކްސްއިން ދުން އަރަމުންދާ ކަމަށް އީރާނު މީޑިއާއިން ބުނެއެވެ.
ރައްދުގައި އީރާނުން ގެންދަނީ ކުވައިތާއި، އުރުދުންގައި ގާއިމްކޮށްފައިވާ އެމެރިކާގެ އަސްކަރީ ބޭސްތަކަށް ވަރުގަދަ މިސައިލް ހަމަލާތަކެއް ދެމުންނެވެ.
އުރުދުން އަސްކަރިއްޔާ އަދި އެމެރިކާ ސިފައިން އޮޕަރޭޓްކުރާ މުވައްފާގް ޝަލްތީ އެއަރބޭހަށް އީރާނުންވަނީ ފަސްވަރަކަށް ބެލިސްޓިކް މިސައިލުން ހަމަލާ ދީފައެވެ. އީރާނުގެ މިސައިލްތައް ހުއްޓުވަން އެއަރ ޑިފެންސް ސިސްޓަމްތައް އެކްޓިވޭޓް ކުރި ނަމަވެސް، ބައެއް މިސައިލްތައް ބޭހަށް އަމާޒުވާ މަންޒަރު ފެންނަ ވީޑިއޯތައް އާންމުވެފައި ވެއެވެ.
ކުވައިތުގައި އެމެރިކާ ސިފައިން ތިބޭ ބޭސްތަކުން ބާރުގަދަ ގޮވުންތަކުގެ އަޑުފަށްގަނޑު އިވެމުންދާއިރު، ނުރައްކާ އަންނަ ކަމުގެ ޑަނޑޫރާގެ އަޑު މެދުނުކެނޑޭ ކަމަށް މީޑިއާ ރިޕޯޓްތައް ބުނެއެވެ.
މީގެއިތުރުން، އީރާނުގެ މިސައިލް ހަމަލާތައް ބަހްރެއިންގައި އޮންނަ އެމެރިކާ ކަނޑުގެ ސިފައިންގެ ފިފްތު ފްލީޓުގެ ހެޑްކުއާޓަރަށްވެސް އަމާޒުކުރަމުންދާ ކަމަށް ރިޕޯޓްތައް ބުނެއެވެ.
އެމެރިކާ ސިފައިން ރޭގައިވަނީ އީރާނުގެ އެކި ސިޓީތަކަށް ނުވަދިހައަށްވުރެ ގިނަ ވައިގެ ހަމަލާ ދީފައެވެ. ހަމަލާތައް އަމާޒުކުރީ އީރާނު އަސްކަރިއްޔާއާ ގުޅުންހުރި ތަންތަނަށް ކަމަށް އެމެރިކާގެ ސެންޓްރަލް ކޮމާންޑުން ބުނި ނަމަވެސް، އިންޖީނުގެތަކާއި، ބްރިޖަކަށާއި، ރޭގު މަގު ވިއުގައަކަށާއި، ހޮސްޕިޓަލަކަށްވެސް އެމެރިކާ ސިފައިން ބޮންއެޅި ކަމަށް އީރާނު ސަރުކާރާ ހަވާލާދީ އީރާނު މީޑިއާއިން ބުނެއެވެ.
ކިޔުންތެރިންގެ ހިޔާލު