އީރާނާއި އެމެރިކާއާ ދެމެދު ގަތަރުގައި ވާހަކަތައް ކުރިއަށް އެބަދާ ކަމަށާއި، ވާހަކަތައް ކުރިއަށްދަނީ “ވަރަށް ރަނގަޅަށް” ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.
އެމެރިކާގެ ރައީސް މިހެން ބުނެފައިވަނީ، އެމެރިކާގެ ޖޮއިންޓް ބޭސް އެންޑްރޫސްގައި ނޫސްވެރިންނާ ވާހަކަ ދައްކަމުންނެވެ.
ދޯހާގައި ކުރިއަށްދަނީ ޓެކްނިކަލް ލެވެލްގެ ވާހަކަތައް ކަމަށާއި، އެމެރިކާއާއި އީރާނުގެ ވެރިންގެ ފެންވަރުގެ ބޭފުޅުން ސީދާސީދާ ބައްދަލުކުރައްވައި ވާހަކަ ދައްކަން ހަމަޖެހިފައި ނުވާ ކަމަށް މީޑިއާ ރިޕޯޓްތައް ބުނެއެވެ.
ދޯހާގައި މިވަގުތު ވާހަކަތައް ނުވަތަ މަޝްވަރާ ކުރަމުންދާ ނުކުތާތަކުގެ ތެރޭގައި ގަނޑުކޮށްފައިވާ އީރާނުގެ ފަންޑުތައް ދޫކޮށްލުމާއި، އީރާނުގެ ނިއުކްލިއަރ މައްސަލަވެސް ހިމެނެއެވެ.
ނޫސްވެރިންނާ ވާހަކަ ދައްކަމުން އެމެރިކާގެ ރައީސް ޓްރަމްޕްވަނީ، އީރާނަށް ނިއުކްލިއާ ހަތިޔާރެއް ނުލިބޭނެ ކަމަށް ބުނާ ވާހަކަ ތަކުރާރު ކޮށްފައެވެ.
އީރާނާއި އެމެރިކާއާ ދެމެދު މަޝްވަރާތައް ކުރިއަށްދާކަން އީރާނުންވެސް ވަނީ ކަށަވަރު ކޮށްދީފައެވެ.
އީރާނުން އިއްޔެ ބުނެފައިވަނީ، އީރާނުގެ އެކްސްޕާޓުންގެ ޓީމެއް ދޯހާއަށްދާން އުޅޭ ކަމަށާއި، ނަމަވެސް އެއީ އެމެރިކާއާ ވާހަކަ ދައްކަން ކުރާދަތުރެއް ނޫން ކަމަށެވެ.
އަނެއްކޮޅުން، އެމެރިކާގެ ވަފުދެއްވެސް މިހާރުވަނީ ގަތަރަށް ގޮސްފައެވެ. އެމެރިކާގެ ފަރާތުން އީރާނާއެކު މަޝްވަރާ ކުރާ ޓީމުގައި ހިމެނޭ އެންމެ އިސް ދެ މަންދޫބުން ކަމަށްވާ ސްޓީވް ވިޓްކޮފާއި، ޖެރެޑް ކުޝްނަރ މިހާރު ތިބީ ދޯހާގައެވެ. ގަތަރުގެ އަމީރު ޝައިޚް ތަމީމް ބިން ހަމަދު އައްޘާނީ މިއަދުވަނީ ވިޓްކޮފް އަދި ކުޝްނަރއާ ބައްދަލު ކުރައްވައި، ވާހަކަތަކުން ހޯދިފައިވާ ކުރިއެރުންތަކާ ގުޅޭގޮތުން މަޝްވަރާ ކުރައްވާފައެވެ.
ހަމަ އެއާއެކު، ލުބުނާނުގެ ހާލަތާއި އަދި ހަމަލާތައް ހުއްޓާލުމަށް ވެފައިވާ އެއްބަސްވުމުގެ މަތީގައި ދެމިތިބުމުގެ މުހިންމު ކަމާ ގުޅޭގޮތުންވެސް ގަތަރުގެ އަމީރު މަޝްވަރާ ކުރެއްވި ކަމަށް، އަމީރުގެ އޮފީހުން ހާމަކޮށްފައި ވެއެވެ.
ކިޔުންތެރިންގެ ހިޔާލު