ފާއިތުވި ހަފްތާގެ ތެރޭގައި ހިމަބިހީގެ 44 ކޭސް ރިޕޯޓްކޮށްފައިވާކަމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން ބުނެފިއެވެ.
އެޗްޕީއޭއިން ބުނީ މިހާތަނަށް 66 ކޭސް ރިކޯޑްކުރެވިފައިވާކަމަށެވެ. މިދިޔަ ހަފުތާގައި 44 ކޭސް ރެކޯޑްކުރި ނަމަވެސް، މިވަގުތު އެކްޓިވް ކޭސްތަކުގެ ޢަދަދަކީ 13 ކޭސްކަމަށްވެސް އެޗްޕީއޭއިން ބުންޏެވެ. ހިމަބިހީގެ ކޭސްގެ ޢަދަދު އިތުރުވީ ޓެސްޓު ކުރި ޢަދަދު އިތުރުވުމުންކަމަށްވެސް އެޗްޕީއޭއިން ބުންޏެވެ.
ހިމަބިހި ޖެހުނު މީހުންގެ ތެރޭގައި ގިނައިން ހިމެނެނީ، 15 އަހަރާއި 39 އަހަރާ ދެމެދުގެ މީހުންނެވެ. ޕޮޒިޓިވްވި މީހުންގެ އެކްޓިވް ކޮންޓެކްޓުގެ ޢަދަދު 258އަށް އަރާކަމަށްވެސް އެޗްޕީއޭއިން ބުންޏެވެ. މިހާތަނަށް 569 މީހުން ވަނީ ބައްޔަށް ޓެސްޓް ކޮށްފައެވެ.
މީސަލްސް ނުވަތަ ހިމަބިއްސަކީ، ވައިރަހުގެ ސަބަބުން ގައިން ގަޔަށް ފަސޭހައިން ފެތުރޭ ބައްޔެކެވެ. އެކަކުގެ ގައިން 16-18 މީހުންނަށް ބަލި ފެތުރެއެވެ. ނަމަވެސް ރާއްޖޭގެ ބޮޑު އާބާދީއަކީ އެމްއާރް ވެކްސިން ފުރިހަމަކޮށްފައިވާ އާބާދީއަކަށްވުމާއެކު ރާއްޖޭގައި މި ޕެޓާން ނުފެންނަ ކަމަށް ވިދާޅުވިއެވެ.
ރާއްޖޭގައި މި ބަލީގެ 4 ކްލަސްޓްރައެއް މިވަގުތު އެބައޮތްކަމަށް އެޗްޕީއޭއީން ބުންޏެވެ. މިއީ ރާއްޖެއިން ނައްތާލެވިފައިވާ ބައްޔަކަށްވުމާއެކު، އައުޓްބްރޭކާ ގުޅިގެން ޓެސްޓިންއާއި ވެކްސިން ކެޕޭސިޓީ އިތުރު ކުރުމަށް ޑަބްލިއުއެޗްއޯގެ އިތުރުން ބައެއް ޤައުމުތަކާއެކުވެސް މަސައްކަތްކޮށް ބައެއް ތަކެތި މިހާރު ރާއްޖެއަށް ލިބިފައިވާކަމަށް އެޗްޕީއޭއިން ބުންޏެވެ.
ކިޔުންތެރިންގެ ހިޔާލު