ހުޅުމާލެ ހޮސްޕިޓަލުން ބަލިމީހުންނަށް ދޭ އަވަސް ފަރުވާގެ ހިދުމަތްތައް އިތުރަށް ލުއިފަސޭހަކޮށްދިނުމުގެ މަގުސަދުގައި، އައުޓްޕޭޝަންޓް ނާސިންގެ ހިދުމަތް އިއްޔެ ރަސްމީކޮށް ތައާރަފުކޮށްފިއެވެ.
ހުޅުމާލެ ހޮސްޕިޓަލުގައި އިއްޔެ ބޭއްވި ހާއްސަ ރަސްމިއްޔާތެއްގައި މި އާ ހިދުމަތް ރަސްމީކޮށް ފައްޓަވައިދެއްވީ މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާގު ހަލީމެވެ. މި ރަސްމިއްޔާތުގައި އެ ހޮސްޕިޓަލުގެ އިސް ވެރިންނާއި ގިނަ އަދަދެއްގެ ނަރުހުން ބައިވެރިވެވަޑައިގަތެވެ. ހުޅުމާލެ ހޮސްޕިޓަލުން މައުލޫމާތު ދިން ގޮތުގައި، މިއީ އެޑްމިޓް ނުކޮށް އާންމުކޮށް ދޭންޖެހޭ ނާސިންގެ ފަރުވާތައް ރައްޔިތުންނަށް އަވަހަށް އަދި ފަސޭހަކަމާއެކު ފޯރުކޮށްދިނުމަށް ފެށި މުހިންމު މަސައްކަތެކެވެ.
އައުޓްޕޭޝަންޓް ނާސިންގެ ހިދުމަތުގެ ދަށުން ގިނަ ފަރުވާތަކެއް ހޮސްޕިޓަލުން ލިބޭނެ އިންތިޒާމު ވަނީ ހަމަޖެހިފައެވެ. މީގެ ތެރޭގައި އިންޖެކްޝަން ޖަހައިދިނުމާއި، ފާރުގައި ބޭސްއަޅައިދިނުމާއި، އާވި އަރުވައިދިނުން ހިމެނެއެވެ. މީގެ އިތުރުން މާބަނޑު މީހުންގެ ބަނޑުގައިވާ ދަރިފުޅުގެ ވިންދު ބަލައިދިނުމާއި، ހަކުރު ޓެސްޓުކުރުމާއި، ލޭ ނެގުމުގެ އިތުރުން ލޭ ހަދިޔާކުރުމުގެ ހިދުމަތްވެސް މިތަނުން ލިބޭނެއެވެ. ހަމައެހެންމެ، ނަރުހުންގެ ފަރާތުން ބޭނުންވާ އެހެނިހެން ހިދުމަތްތައްވެސް މި އޯޕީޑީ މެދުވެރިކޮށް އަވަހަށް ލިބޭނެކަމަށް އެ ހޮސްޕިޓަލުން ހާމަކޮށްފައިވެއެވެ.
މި އާ ހިދުމަތަކީ ބަލިމީހުންނަށް ހޮސްޕިޓަލުގައި ގިނަ ވަގުތު މަޑުކުރަން ނުޖެހި، އަވަސް ފަރުވާ ހޯދުމަށް މަގުފަހިކޮށްދޭނެ ނިޒާމެކެވެ. ހުޅުމާލެ ހޮސްޕިޓަލުން ބުނެފައިވާ ގޮތުގައި، އައުޓްޕޭޝަންޓް ނާސިންގެ ހިދުމަތް އާންމުންނަށް ލިބެން ހުންނާނީ ކޮންމެ ދުވަހެއްގެ ހެނދުނު 8:00 އިން ފެށިގެން ރޭގަނޑު 11:00 އަށެވެ. މިއީ ހުޅުމާލޭގެ އާބާދީއަށް ބޭނުންވާ ސިއްހީ ފަރުވާގެ ކަންކަން އިތުރަށް ހަރުދަނާކުރުމަށް އެޅުނު މުހިންމު ފިޔަވަޅެކެވެ.
ކިޔުންތެރިންގެ ހިޔާލު