ވެލާނާ އިންޓަނޭޝަނަލް އެއާޕޯޓުގެ ކާރިސާތަކާއި ކުއްލި ހާލަތްތައް މެނޭޖްކުރުމުގެ ގާބިލުކަން އިތުރުކުރުމަށްޓަކައި، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ގައުމީ މުހިންމު އިދާރާތަކަކާއެކު ފަހުމުނާމާތަކެއްގައި ސޮއިކޮށްފިއެވެ.
މި ފަހުމުނާމާތަކުގައި ސޮއިކުރުމަށްޓަކައި ހުޅުލޭ އައިލެންޑް ހޮޓެލްގައި ބޭއްވި ހާއްސަ ރަސްމިއްޔާތުގައި، އެމްއޭސީއެލްގެ އިތުރުން ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)، މޯލްޑިވްސް މީޓިއޮރޮލޮޖިކަލް ސާވިސް (އެމްއެމްއެސް) އަދި މޯލްޑިވްސް ރެޑް ކްރެސެންޓް (އެމްއާރްސީ) އިން ބައިވެރިވިއެވެ.
“އެއާޕޯޓް ކްރައިސިސް މެނޭޖްމަންޓް” ގެ ނަމުގައި ބޭއްވި މި ރަސްމިއްޔާތުގައި އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުހައްމަދާއި އެންވަޔަރަންމަންޓް މިނިސްޓްރީގެ ސްޓޭޓް މިނިސްޓަރު އިބްރާހީމް މިމްރާހުގެ އިތުރުން ކަމާގުޅޭ މުއައްސަސާތަކުގެ އިސްވެރިން ބައިވެރިވެވަޑައިގެންނެވިއެވެ.
އެމްއޭސީއެލުން ބުނި ގޮތުގައި މި ފަހުމުނާމާތަކުގެ މައިގަނޑު ބޭނުމަކީ ރާއްޖޭގެ މައި އެއާޕޯޓުގައި ކުއްލި ނުރައްކަލުގެ ހާލަތްތަކަށް ވީއައިއޭ ވެފައިވާ ތައްޔާރީތައް އިތުރަށް ހަރުދަނާކުރުމެވެ. އެއާޕޯޓުގެ ރައްކާތެރިކަން ކަށަވަރުކުރުމަށް ހުރިހާ އިދާރާތަކެއް ގުޅިގެން މަސައްކަތްކުރުމާއި، މައުލޫމާތު ބަދަލުކުރުމާއި މުއާމަލާތުކުރުމުގެ ނިޒާމު ހަރުދަނާކުރުމަކީ މިހާރުގެ ހާލަތަށް ބަލާއިރު ކޮންމެހެން ބޭނުންތެރި ކަމެއްކަމަށް އެ ކުންފުނިން ފާހަގަކުރެއެވެ. މި އެއްބަސްވުންތަކުގެ ސަބަބުން ރަސްމީ އޮނިގަނޑެއްގެ ތެރެއިން އެކި އިދާރާތަކާ ދެމެދު އެއްބާރުލުން ދިނުމަށް ފުރުސަތު ހުޅުވިގެންދާނެއެވެ.
މި ފަހުމުނާމާތަކުގެ ދަށުން ކޮންމެ މުއައްސަސާއެއްގެ ވެސް ދައުރު ސާފުކޮށް ކަނޑައެޅިގެންދާނެއެވެ.
މީގެ އިތުރުން، ކުއްލި ހާލަތްތަކުގައި ގުޅިގެން ހަރަކާތްތެރިވާނެ ގޮތްތައް ދެނެގަތުމަށް ބޭނުންވާ ތަމްރީނުތަކާއި ސިމިއުލޭޝަންތައް ހިންގުމަށް ވަނީ ރޭވިފައެވެ. ވީއައިއޭއަކީ ކާރިސާތަކަށް ތައްޔާރަށް އޮތް ރައްކާތެރި ތަނެއްގެ ގޮތުގައި ދެމެހެއްޓުމަށްޓަކައި އެމްއޭސީއެލުން އަބަދުވެސް މަސައްކަތް ކުރަމުން ގެންދާނެ ކަމަށް އެ ކުންފުނިން ވަނީ ބުނެފައެވެ.
ކިޔުންތެރިންގެ ހިޔާލު