އެމެރިކާ ސިފައިން އީރާނަށް ވަރުގަދަ ވައިގެ ހަމަލާތަކެއް ދިނުމާ ގުޅިގެން އީރާނުން އެކަން ވަރަށް ބޮޑަށް ކުށްވެރިކޮށް، ބަދަލު ހިފާނޭކަމުގެ އިންޒާރު ދީފިއެވެ.
ހޮރްމޫޒު ކަނޑުއޮޅިން ދަތުރުކުރި ކާގޯ ބޯޓަކަށް އީރާނުން ބުޜާސްފަތި ދުވަހު ހަމަލާ ދިން ކަމަށް ބުނެ އެމެރިކާ ސިފައިންވަނީ، އީރާނުގެ އެތައް ތަނަކަށް މިރޭ މިސައިލާއި ޑްރޯން ބޭނުންކޮށްގެން ވަރުގަދަ ހަމަލާތަކެއް ދީފައެވެ.
ހަމަލާތައް ދިނުމަށްފަހު އެމެރިކާގެ ސެންޓްރަލް ކޮމާންޑުން ބުނެފައިވަނީ، އެމެރިކާ ސިފައިން ހަމަލާދިނީ އީރާނުން މިސައިލާއި ޑްރޯން ރައްކާކޮށްފައި ހުރި ތަންތަނަށާއި، އައްސޭރިފަށުގެ ރާޑަރު ސައިޓްތަކަށް ކަމަށެވެ.
އެކްސްގައި ޕޯސްޓްކުރި މެސެޖެއްގައި ސެންޓްރަލް ކޮމާންޑުން ބުނެފައިވަނީ، އީރާނުން ބުރާސްފަތި ދުވަހު މުދާއުފުލާ “އެމްވީ އެވަރ ލަވްލީ” އަށް ދިން ޑްރޯން ހަމަލާއަކީ، ހަމަލާތައް ހުއްޓާލުމަށް ވެފައިވާ އެއްބަސްވުމާ ޚިލާފަށް ދިން ހަމަލާއެއް ކަމަށެވެ.
އެމެރިކާއިން ދިން ހަމަލާތަކުގައި ލިބުނު ގެއްލުންތަކާ ގުޅޭގޮތުން އީރާނުން އަދި އެއްވެސް އެއްޗެއް ނުބުނެއެވެ.
އެމެރިކާއިން ދިން އުދުވާނީ ހަމަލާތަކާ ގުޅިގެން އީރާނުގެ އިންގިލާބީ ލަޝްކަރުން ފުރަތަމަ ނެރުނު ބަޔާން މިހާރުވަނީ ނަގާފައެވެ. އެހެންކަމުން، އެމެރިކާގެ ހަމަލާތަކަށް އިންގިލާބީ ލަޝްކަރުގެ ރަސްމީ ބަހެއް އަދި ނެތެވެ.
އެ ބަޔާނުގައި އެމެރިކާގެ ކިބައިން ބަދަލު ހިފާނޭކަމުގެ އިންޒާރު ދީފައި ވެއެވެ.
އީރާނު ޕާލަމެންޓުގެ ގައުމީ ސަލާމަތާބެހޭ ކޮމިޓީގެ ވެރިޔާ އިބްރާހިމް އަޒީޒީ ވިދާޅުވީ، އީރާނާއި އެމެރިކާއާ ދެމެދު ކުރިއަށްދާ ވާހަތަކަށް އަދި ހަނގުރާމަ ހުއްޓާލުމަށް ވެފައިވާ އެއްބަސްވުމަށް އެމެރިކާގެ ރައީސް ޓްރަމްޕް އެއްވެސް ވަރަކަށް އިހްތިރާމް ނުކުރާކަން މިކަމުން ހާމަވެގެން ގޮސްފައިވާ ކަމަށެވެ.
އެމެރިކާއިން ހިންގި މި އަމަލަށް އެމީހުން ހިތާމަކުރަން ޖެހޭނޭ ކަމަށްވެސް އިބްރާހިމް އަޒީޒީ ވިދާޅުވެފައި ވެއެވެ.
ކިޔުންތެރިންގެ ހިޔާލު