އެމެރިކާއިން ޑިމާންޑްކުރިޔަސް ލުބުނާނުން ސިފައިން ނުލާބާނޭ ކަމަށް، އިސްތިއުމާރީ ދައުލަތުގެ ޑިފެންސް މިނިސްޓަރ ޔިސްރައިލް ކާޓްޒް ބުނެފިއެވެ.
އިސްރާއީލުގެ ނޫހަކަށް ދިން އިންޓަރވިއުއެއްގައި އޭނާ ބުނީ، އެމެރިކާއިން ކިތަންމެ ޑިމާންޑެއް ކުރިޔަސް ލުބުނާނުގެ ދެކުނުން ސިފައިން ނުބާލާނޭ ކަމަށާއި، އަދި ލުބުނާނުގެ ދެކުނުން ގެދޮރުދޫކޮށް ދިޔަ ދެލައްކަ އާންމުންނަށްވެސް އެނބުރި އެ ސަރަހައްދަށް ނާދެވޭނޭ ކަމަށެވެ. އަޔަކަނުދޭނޭ ކަމަށެވެ.
އެ ދެލައްކަ މީހުންނަކީ އިސްތިއުމާރީ ސިފައިން ލުބުނާނުގެ ދެކުނަށް އެއްގަމުމަގުން އަރައިގަތުމާއި، އަދި ދެކުނަށް ދެމުންގެންދިޔަ ވަރުގަދަ ވައިގެ ހަމަލާތަކާ ގުޅިގެން ގެދޮރުދޫކޮށް ދާން މަޖުބޫރުވި އާންމުންނެވެ.
އިސްތިއުމާރީ ސިފައިންގެ ހަމަލާތަކުގައި އެތައްސަތޭކަ އާންމުން މަރުވެފައިވާއިރު، ދެކުނުގެ އެތައް ރަށެއްވަނީ މުޅިން ސުންނާފަތި ކޮށްލާފައެވެ.
ލުބުނާނުގެ ދެކުނަށް ދެމުންގެންދިޔަ އުދުވާނީ ހަމަލާތައް ހުއްޓައި އަދި ލުބުނާނުގެ ދެކުނުން ސިފައިން ބޭލުމަކީ، އީރާނުގެ ޑިމާންޑާ އެއްގޮތަށް އެމެރިކާއާއި އީރާނާ ދެމެދު ސޮއިކުރި އެމްއޯޔޫގައި ހިމެނޭ ފުރަތަމަ މާއްދާއެވެ. އިސްރާއީލު ހުއްޓުވުމަކީ އެމެރިކާގެ ޒިންމާއެކެވެ.
އެހެން ނަމަވެސް، މުޖުރިމު ނަތަންޔާހޫއާއި، އޭނާގެ ކެބިނެޓުގައި ހިމެނޭ ޒަޔަނިސްޓު ޓެރަރިސްޓު މިނިސްޓަރުން ފާޅުގައި ގެންދަނީ އެމެރިކާގެ ރައީސަށާއި، އެމެރިކާ ސަރުކާރަށް ގޮންޖަހަމުންނެވެ.
އެމެރިކާއިން ބޮޑެތި ޕްރެޝަރުތަކެއް ކުރިމަތިކުރާން ފެށުމުން ލުބުނާނަށް ދެމުންގެންދިޔަ ވައިގެ ހަމަލާތައް އިސްތިއުމާރީ ސިފައިން މިހާރު ހުއްޓާލާފައި ވީނަމަވެސް، އެއްގަމުމަގުން ކޮންމެވެސް ވަރަކަށް ހަމަލާތައް މިހާރުވެސް ދެމުން ގެންދެއެވެ.
އިސްތިއުމާރީ ދައުލަތުގެ ޑިފެންސް މިނިސްޓަރު ބުނެފައިވަނީ، ލުބުނާނުގެ ދެކުނަކީ މިހާރު އިސްރާއީލުން ކަނޑައަޅާފައިވާ “ސެކިއުރިޓީ ޒޯން” ކަމަށާއި، އެ ސަރަހައްދު ދޫކޮށް ސިފައިން ނުދާނޭ ކަމަށެވެ.
ނަތަންޔާހޫވެސް ބުނެފައިވަނީ “ކޮންމެގޮތެއްވިޔަސް” ލުބުނާނުގެ ދެކުނުން ސިފައިން ނުބާލާނޭ ކަމަށެވެ.
ރިޕޯޓްތައް ބުނާގޮތުގައި، އިސްރާއީލުން އެމެރިކާގެ އެންގުންތަކާ ފާޅުގައި ދެކޮޅު ހަދައި ގޮންޖަހަމުންގެންދާ މައްސަލާގައި، އިސްރާއީލަށް ޕްރެޝަރ ކުރުމަށްޓަކައި ޓްރަމްޕް މިހާރު ގެންދަނީ އެކި ގޮތްގޮތުން ދަތިކުރަމުންނެވެ. އެމެރިކާއިން އަޅަމުންދާ ފިޔަވަޅުތަކުން އިސްރާއީލަށް ލިބޭ މެސެޖަކީ، އެމެރިކާގެ ހުއްދަނެތި ކަންކަން ކުރުމަށް އިސްރާއީލަށް އޮތް ފުރުސަތު ނިމުމަކަށް އައިސްފައިވާކަމުގެ މެސެޖް ކަމަށް، އިސްރާއީލުގެ މުހައްލިލުން ބުނެއެވެ.
ކިޔުންތެރިންގެ ހިޔާލު