މިހާރު ޕާކިސްތާނަށް ވަޑައިގެން އުޅުއްވާ އީރާނުގެ ރައީސް ޑރ. މަސްއޫދު ޕެޒެޝްކިއާން، އިސްލާމްއާބާދުގައި ޕާކިސްތާނުގެ ބޮޑުވަޒީރު ޝަހްބާޒް ޝަރީފްއާ ބައްދަލު ކުރައްވައިފިއެވެ.
އީރާނުގެ ރައީސް މަސްއޫދު ޕެޒެޝްކިއާން ޕާކިސްތާނަށް ވަޑައިގެންފައިވަނީ މިއަދު މެންދުރުގެ ވަގުތުގައެވެ. އީރާނުގެ ރައީސަށް ޕާކިސްތާނުންވަނީ ބަތަލެއްގެ ދަރަޖައިގެ ތާރީޚީ ހޫނު މަރްހަބާއެއް ދަންނަވާފައެވެ. މަރްހަބާގެ ޚާއްސަ ރަސްމިއްޔާތު ބާއްވާފައިވަނީ ބޮޑުވަޒީރުގެ ރަސްމީ ގެކޮޅުގައެވެ.
މިއީ، އެމެރިކާއާއި އިސްރާއީލުން އީރާނާ ދެކޮޅަށް ފެށި ހަނގުރާމައިގެފަހުން އީރާނުގެ ރައީސް ގައުމުން ބޭރަށް ވަޑައިގެންނެވި ފުރަތަމަ ފަހަރެވެ.
އީރާނުގެ ރައީސް ވަޑައިގެންނެވިފަހުން އީރާނުގެ ޚާރިޖީ ވަޒީރު އައްބާސް އަރަޣްޗީވެސް ވަނީ އިސްލާމްއާބާދަށް ވަޑައިގެންފައެވެ.
ޕާކިސްތާނުގެ ބޮޑުވަޒީރާ ބައްދަލު ކުރެއްވުމުގެ ކުރިން އީރާނުގެ ރައީސް މަސްއޫދު ޕެޒެޝްކިއާންވަނީ، ޕާކިސްތާނު ސިފައިންގެ ވެރިޔާ އަދި ޗީފް އޮފް ޑިފެންސް ފޯސް ފީލްޑް މާޝަލް ސައްޔިދު އާސިމް މުނީރުއާ ބައްދަލު ކުރައްވާފައެވެ.
އީރާނުގެ ރައީސާއި ޕާކިސްތާނުގެ ބޮޑުވަޒީރާ ދެމެދު މައިގަނޑުގޮތެއްގައި މަޝްވަރާތައް ކުރެވުނީ، އެމެރިކާ-އީރާނު އެމްއޯޔޫގެ ވާހަތަކާއި، އެމްއޯޔޫ ތަންފީޒު ކުރުމަށް ކުރެވެމުންދާ މަސައްކަތްތަކާ ގުޅޭގޮތުން ކަމަށް ޚަބަރުތައް ބުނެއެވެ.
އީރާނުގެ ރައީސާއި ޕާކިސްތާނުގެ ބޮޑުވަޒީރާ ދެމެދު ބޭއްވި ބައްދަލުވުމުގައި ޕާކިސްތާނުގެ ބޮޑުވަޒީރުގެ ނައިބް، ޚާރިޖީ ވަޒީރު އަދި ސެންޓަރ މުހައްމަދު އިސްހާގް ދާރްއާއި، ފީލްޑް މާޝަލް ސައްޔިދު އާސިމް މުނީރުވެސް ބައިވެރިވެވަޑައި ގެންނެވިއެވެ.
ޕާކިސްތާނާއި އީރާނާ ދެމެދު ވަފުދު ފެންވަރުގައި ބާއްވާ މަޝްވަރާތައް ކުރިއަށް ތާވަލް ކުރެވިފައިވާ ކަމަށް ޚަބަރުތައް ބުނެއެވެ.
އީރާނާއި އެމެރިކާއާ ދެމެދު ބާއްވާ ވާހަކަތަކުގައި މެދުވެރިއެއްގެ ދައުރު އަދާކުރަމުން ގެންދަނީ ޕާކިސްތާނުންނެވެ. އަދި އެކަމުގައި ގަތަރުންވެސް ގެންދަނީ މުހިންމު ދައުރެއް އަދާކުރަމުންނެވެ.
ކިޔުންތެރިންގެ ހިޔާލު