ރާއްޖޭގެ ރަށްތަކުގައި ފެންބޮޑުވުމުގެ މައްސަލައަށް ހައްލު ހޯދުމަށް ޖަޕާނު ސަރުކާރުން ހަދިޔާކުރި ފެންހިއްކާ ޕަންޕުތައް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭއިން 18 ރަށަކާ ހަވާލުކޮށްފިއެވެ.
ޖަޕާނު ސަރުކާރުގެ ހިލޭ އެހީގެ ދަށުން ކުރިއަށްގެންދާ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮޖެކްޓްގެ ފުރަތަމަ ބުރުގެ ތެރެއިން، ފެންބޮޑުވުމުގެ ކާރިސާތަކުން ރައްކާތެރިވުމަށް ޖުމްލަ 40 ޕަންޕު ވަނީ ލިބިފައެވެ. މި މަޝްރޫޢުގެ ދަށުން 20 ރަށަކަށް ޕަންޕު ބެހުމަށް ހަމަޖެހިފައިވާއިރު، މިހާތަނަށް 18 ރަށަކަށް ޕަންޕުތައް ފޯރުކޮށްދީފައިވާކަމަށް އެންޑީއެމްއޭއިން މައުލޫމާތުދެއެވެ. މި މަޝްރޫޢުގެ ދަށުން ކޮންމެ ރަށަކަށްވެސް ދެ ޕަންޕާއި އެކު ޕަންޕުތައް ބޭނުންކުރުމަށް ބޭނުންވާ އެހެނިހެން ސާމާނުތައް ހަވާލުކުރެވޭނެއެވެ.
ޕަންޕުތައް ހަވާލުކުރި ރަށްތަކުގެ ތެރޭގައި ގއ. ކަނޑުހުޅުދޫ، ހއ. އުލިގަން، ކ. ކާށިދޫ، މ. މުލަށް، ރ. އިނގުރައިދޫ، ރ. ފައިނު، އއ. ފެރިދޫ، ދ. ހުޅުދެލި، ފ. ބިލެއްދޫ، ފ. މަގޫދޫ، ގދ. ހޯޑެއްދޫ، ހއ. ދިއްދޫ، ހއ. އިހަވަންދޫ، ހދ. ނެއްލައިދޫ، ކ. ގާފަރު، ތ. ބުރުނީ، ތ. ކަނޑޫދޫ އަދި ޅ. ނައިފަރު ހިމެނެއެވެ. މި ރަށްތައް ކަނޑައެޅުމުގައި ބަލާފައިވަނީ މީގެ ކުރިން ޕަންޕު ފޯރުކޮށްދީފައިނުވާ ރަށްތަކުގެ ތެރެއިން، ފާއިތުވި އަހަރުތަކުގައި ފެންބޮޑުވުމުގެ ހާދިސާތައް ގިނައިން ހިނގާފައިވާ ރަށްތަކަށެވެ. ބާކީ ތިބި ރަށްތަކަށް ޕަންޕުތައް ފޯރުކޮށްދިނުމުގެ މަސައްކަތް މިހާރު ކުރިއަށްދާކަމަށް އެ އޮތޯރިޓީން ފާހަގަކުރެއެވެ.
މި މަޝްރޫޢަކީ ކާރިސާތަކަށް އިޖާބަދިނުމުގެ ކަންކަން އަތޮޅުތަކުގައި ހަރުދަނާކޮށް، ވިލުންތެރި ރާއްޖެއެއް ބިނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ސިޔާސަތުގެ ދަށުން ކުރިއަށްގެންދާ މުހިންމު މަސައްކަތެކެވެ. މީގެ އިތުރުން، މި މަޝްރޫޢުގެ ދެވަނަ ބުރުގައި އިތުރު 14 ރަށަކަށް ޕަންޕު ފޯރުކޮށްދިނުމަށް ވަނީ ހަމަޖެހިފައެވެ. މޫސުމީ ބަދަލުތަކުގެ ސަބަބުން ކުރިމަތިވާ ފެންބޮޑުވުމުގެ މައްސަލަތަކަށް ދާއިމީ ހައްލެއް ހޯދުމަށް ސަރުކާރުން އަންނަނީ ރަށްރަށުގައި ފެން ހިންދާ ނިޒާމުތައް ޤާއިމުކުރުމުގެ މަސައްކަތްތައްވެސް ކުރަމުންނެވެ.
ކިޔުންތެރިންގެ ހިޔާލު