ސްވިޒަރލޭންޑްގައި ބޭއްވި އީރާން-އެމެރިކާ މަތީފެންވަރުގެ ވާހަކަތަކުގެ ފުރަތަމަ ބުރު ނިންމާލައިފިއެވެ.
ސްވިޒަރލޭންޑްގައި އިއްޔެ ފެށުނު ވާހަކަތަކުގެ ފުރަތަމަ ބުރު ނިންމާލީ 18 ގަޑިއިރުގެ މަޝްވަރާތަކަށް ފަހުއެވެ.
ވާހަކަތަކުގައި އީރާނުގެ ފަރާތުން ބައިވެރިވެވަޑައި ގެންނެވީ އީރާނު ޕާލަމެންޓުގެ ރައީސް މުހައްމަދު ބާގިރު ގާލިބާފާއި، އީރާނުގެ ޚާރިޖީ ވަޒީރު އައްބާސް އަރަޣްޗީއާއި، އީރާނު މަރުކަޒީ ބޭންކްގެ ގަވަރްނަރ އަބްދުއްނާސިރު ހިންމަތީއާއި، އީރާނު ސަރުކާރުގެ ތެލާބެހޭ ވަޒީރުގެ ނައިބް ހާމިދު ބޫރްދްއާއި، ނިއުކްލިއަރ އެކްސްޕާޓް އަލީ ބާކްރީއެވެ.
އެމެރިކާގެ ފަރާތުން ބައިވެރިވެވަޑައި ގެންނެވީ އެމެރިކާގެ ނައިބް ރައީސް ޖޭޑީ ވޭންސްއާއި، ޓްރަމްޕްގެ ޚާއްސަ މަންދޫބު ސްޓީވް ވިޓްކޮފާއި، ޖެރެޑް ކުޝްނަރއެވެ.
ފުރަތަމަ ބުރުގައި ބޭއްވި މަޝްވަރާތަކަށްފަހު އީރާނުގެ ވަފުދު ސްވިޒަރލޭންޑުން ފުރި ނަމަވެސް، އެމްއޯޔޫގައި ހިމެނޭ ކަންކަން ތަންފީޒުކުރުމުގެ ޓެކްނިކަލް ވާހަކަތަކަށް އީރާނުގެ ޓެކްނިކަލް ޓީމެއް ސްވިޒަރލޭންޑްގައި ވަނީ މަޑުކޮށްފައެވެ. ޓެކްނިކަލް ޓީމުގެ ވެރިޔަކަށް ހުންނެވީ އީރާނުގެ ޚާރިޖީ ވަޒީރުގެ ކާޒިމް ޤާރިބްއަބަދީއެވެ.
18 ގަޑިއިރުގެ ވާހަކަތަކަށްފަހު މަޝްވަރާތައް ކުރިއަށް ގެންދާނެ އައުޓްލައިނަކަށް ދެ ފަރާތުން ވަނީ އެއްބަސްވެފައެވެ.
އެކަމަކު، ލުބުނާނުގެ މައްސަލައާއި، އީރާނުގެ ތެލުގެ އެކްސްޕޯޓާއި އަދި ގަނޑުކޮށްފައިވާ އީރާނުގެ ފަންޑުތައް ދޫކޮށްލުމާ ގުޅޭގޮތުން ދެ ފަރާތުން އެއްބަސްވުމަކަށް އައިސްފައިވާ ކަމަށް ޚަބަރުތައް ބުނެއެވެ. އީރާނު ޚާރިޖިއްޔާގެ ތަރުޖަމާނު އިސްމާއިލް ބަގާޔީ ވިދާޅުވީ، ދެންއޮތީ އެކަންކަން ތަންފީޒުކުރުން ކަމަށެވެ.
އިސްރާއީލުން ލުބުނާނަށް ދެމުންގެންދާ ހަމަލާތައް ހުއްޓުވުމާއި، އިސްރާއީލު ސިފައިން ލުބުނާނުން ބޭލުމަކީ އެމެރިކާގެ ފުރަތަމަ ޓެސްޓެވެ.
ކިޔުންތެރިންގެ ހިޔާލު