ދިވެހި ކުންފުނިތަކާ ޙަވާލުކޮށްގެން ތަރައްޤީ ކުރާ 1000 ހައުސިންގ ޔުނިޓުގެ މަސައްކަތް މި ހަފުތާގެ ތެރޭގައި އެ ކުންފުނިތަކާ ޙަވާލުކުރުމަށް މަސައްކަތް ކުރަމުންދާ ކަމަށް ގެދޮރުވެރިކަމާ ބެހޭ ވުޒާރާއިން ހާމަކޮށްފިއެވެ.
ޕީއެސްއެމްގައި ވާހަކަދައްކަވަމުން ގެދޮރުވެރިކަމާ ބެހޭ ވުޒާރާގެ ސްޓޭޓް މިނިސްޓަރ އަޙްމަދު ނާޒިމް މުޙައްމަދު ވިދާޅުވި ގޮތުގައި، މި މަޝްރޫޢު ކުރިއަށް ގެންދިއުމަށް ނިންމާފައިވަނީ 100 އިންސައްތަ ދިވެހި ކުންފުނިތަކާ ޙަވާލުކޮށެވެ. މި މަޝްރޫޢުގެ މަސައްކަތް 5 ކުންފުންޏަކަށް ބަހާލައިގެން ކުރިއަށް ގެންދިއުމަށް ރާވާފައިވާއިރު، ކޮންމެ ކުންފުންޏަކުން ވެސް 200 ހައުސިންގ ޔުނިޓު ތަރައްޤީ ކުރާނެއެވެ. މިއީ މުޅިން ވެސް ދިވެހި ކުންފުނިތަކުގެ ބައިވެރިވުމާއެކު ހިންގާ މަޝްރޫޢެއްކަން މިނިސްޓްރީން ފާހަގަކުރެއެވެ.
މި މަޝްރޫޢުގެ ދަށުން ތަރައްޤީކުރާ ޔުނިޓުތަކަކީ މިހާތަނަށް ރާއްޖޭގައި ސޯޝަލް ހައުސިންގގެ ގޮތުގައި ތަރައްޤީކޮށްފައިވާ ޔުނިޓުތަކަށްވުރެ ޖާގަ ތަނަވަސް ތަންތަނަކަށް ވާނެއެވެ. އެގޮތުން، ކޮންމެ ކުންފުންޏަކާ ޙަވާލުކުރާ މަޝްރޫޢުގެ ތެރެއިން 60 ޔުނިޓަކީ 2 ކޮޓަރީގެ އެޕާޓްމަންޓުތަކަކަށް ވާއިރު، 140 ޔުނިޓަކީ 3 ކޮޓަރީގެ އެޕާޓްމަންޓުތަކެވެ. މި ތަންތަނުގެ ސައިޒަށް ބަލާއިރު، 2 ކޮޓަރީގެ އެޕާޓްމަންޓުތައް 700 އަކަފޫޓަށް ވުރެ ބޮޑުވާނެ ކަމަށާއި، 3 ކޮޓަރީގެ އެޕާޓްމަންޓުތައް 950 އަކަފޫޓަށް ވުރެ ބޮޑުވާނެ ކަމަށް ވުޒާރާއިން މަޢުލޫމާތު ދެއެވެ. މީގެއިތުރުން، އިމާރާތްތަކުގެ ފިނިޝިންއާއި ވަށައިގެންވާ ޖާގަތައް ކުރީގެ މަޝްރޫޢުތަކާ އަޅާބަލާއިރު ތަރައްޤީކޮށްފައި ހުންނާނެ ކަމަށް ވެސް ވިދާޅުވިއެވެ.
މި 1000 ޔުނިޓުގެ މަޝްރޫޢު ކުރިއަށް ގެންދިއުމަށް ހަމަޖެހިފައިވަނީ ހުޅުމާލެ ފޭސް 2 ގައެވެ. ސަރުކާރުން ބޯހިޔާވަހިކަމުގެ މައްސަލައަށް ޙައްލު ހޯދުމަށް ފަށާފައިވާ މިފަދަ މަޝްރޫޢުތައް މާލެ ސަރަޙައްދާއި އަތޮޅުތަކުގެ ރަށްރަށުގައި ވެސް އެކި މަރުޙަލާތަކުގައި އަންނަނީ ކުރަމުންނެވެ. ހުޅުމާލެ ފޭސް 1 އިން 3 ބިމަކާއި، ވިލިމާލެއިން 1 ބިމެއް ދިވެހި ކުންފުނިތަކާ މިހާރު ވެސް ޙަވާލުކޮށްފައިވާ ކަމަށް ހައުސިން މިނިސްޓްރީން ބުނެއެވެ. މީގެއިތުރުން، ހުޅުމާލެ ފޭސް 2 އިން ޗައިނާގެ 2 ކުންފުންޏަކާ ބިންތަކެއް ޙަވާލުކޮށްފައިވާއިރު، އެ މަޝްރޫޢުތަކުގެ ޑިޒައިން ކުރުމުގެ މަސައްކަތް ނިމި، ހުއްދަތައް ލިބުމާއެކު ޢަމަލީ މަސައްކަތް ފެށޭނެ ކަމަށް ވެސް އެ ވުޒާރާއިން ހާމަކުރެއެވެ.
ކިޔުންތެރިންގެ ހިޔާލު