މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ޑެޕިއުޓީ ސީއީއޯގެ މަގާމުގައި ހުންނެވި އިބްރާހީމް ޒިޔަތު އެ މަގާމުން އިސްތިއުފާ ދެއްވައިފިއެވެ.
އެމްޕީއެލްގެ ޑެޕިއުޓީ ސީއީއޯ އިބްރާހީމް ޒިޔަތު އިސްތިއުފާ ދެއްވިކަން އެ ކުންފުނިން ވަނީ ކަށަވަރުކޮށްދީފައެވެ. ޒިޔަތު އިސްތިއުފާ ދެއްވި ސަބަބެއް ރަސްމީކޮށް ހާމަކޮށްފައިނުވި ނަމަވެސް، އޭނާ އެ މަގާމުން ވަކިވެވަޑައިގަތީ އެ ކުންފުނީގެ ބޯޑުގެ އެގްޒެކުޓިވް މެންބަރުކަމުގެ މަގާމުން މިދިޔަ މާރިޗު މަހުގެ 16ވަނަ ދުވަހު އޭނާ ވަކިކުރިތާ މާ ގިނަ ދުވަސްތަކެއް ނުވަނީސްކަން ފާހަގަކުރެވެއެވެ. ބޯޑު މެންބަރުކަމުން ވަކިކުރުމަށްފަހު އޭނާ ހުންނެވީ ހަމައެކަނި ޑެޕިއުޓީ ސީއީއޯގެ މަގާމުގައެވެ.
ޒިޔަތު މަގާމުން ވަކިވެވަޑައިގަތުމާ ގުޅިގެން، އެމްޕީއެލްގެ ބޯޑަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ކުރީގެ ޑެޕިއުޓީ ސީއީއޯ މުޙައްމަދު ލަމްޢާން ވަނީ އައްޔަންކުރައްވައިފައެވެ. ލަމްޢާންއަކީ މީގެ ކުރިން ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމާއި، މިފްކޯގެ އިސް މަގާމުތައް ފުރުއްވާފައިވާ، ކޯޕަރޭޓް ގަވާނަންސް އަދި ލީޑާޝިޕްގެ ދާއިރާއިން ތަޖުރިބާ ހުރި ބޭފުޅެކެވެ. ލަމްޢާން ވަނީ ޔުނިވާސިޓީ އޮފް ކޮލަމްބޯއިން މާސްޓާސް އޮފް ބިޒްނަސް އެޑްމިނިސްޓްރޭޝަން (އެމްބީއޭ) ހާސިލުކުރައްވައިފައެވެ. މިވަގުތު އެމްޕީއެލްގެ ޑެޕިއުޓީ ސީއީއޯގެ މަގާމުގައި ތިއްބެވީ މުޙައްމަދު މުޢީނާއި ޢަލީ ހާޝިމެވެ.
ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓާސް ހާސިލުކުރައްވާފައިވާ ޒިޔަތަކީ މީގެ ކުރިން އެމްޓީސީސީގެ ސީއީއޯކަން އަދި އެސްޓީއޯގައި 15 އަހަރު ދުވަހު ޚިދުމަތްކުރައްވާފައިވާ ބޭފުޅެކެވެ.
ކިޔުންތެރިންގެ ހިޔާލު