މޯލްޑިވްސް ޕޯޓްސް ލިމިޓެޑްގެ ސޭފްޓީ ޑިޕާޓްމަންޓުން އިންތިޒާމުކޮށްގެން އެ ކުންފުނީގެ އެޑްމިނިސްޓްރޭޝަން މުވައްޒަފުންނަށް އަމާޒުކޮށްގެން އަލިފާން ނިއްވުމުގެ އަސާސީ ތަމްރީނު ޕްރޮގްރާމެއް ކާމިޔާބުކަމާއެކު ނިންމާލައިފިއެވެ.
މި ތަމްރީނު ޕްރޮގްރާމަކީ މަސައްކަތުގެ މާހައުލުގައި ދިމާވެދާނެ އަލިފާނުގެ ހާދިސާތަކުން ރައްކާތެރިވުމަށާއި އެފަދަ ހާދިސާއެއް ހިނގައިފި ހާލަތެއްގައި އަމަލުކުރަންޖެހޭނެ ރަނގަޅު ގޮތްތައް މުވައްޒަފުންނަށް ދަސްކޮށްދިނުމުގެ މަގުސަދުގައި ކުރިއަށް ގެންދިޔަ ޕްރޮގްރާމެކެވެ. މި ޕްރޮގްރާމްގެ ސަބަބުން ކުއްލި ހާލަތްތަކުގައި މުވައްޒަފުންގެ ހޭލުންތެރިކަން އިތުރުވެ ސަލާމަތީ ފިޔަވަޅުތައް އެޅުމަށް ފަސޭހަވެގެންދާނެއެވެ.
މި ޕްރޮގްރާމްގައި ބައިވެރިވި ހުރިހާ މުވައްޒަފުންނަށް ވަނީ ތިއަރީ އަދި އަމަލީ ސެޝަންތަކެއް ކުރިއަށް ގެންގޮސްފައެވެ. ތިއަރީ ސެޝަންތަކުގައި އަލިފާން ރޯވާން މެދުވެރިވާ ސަބަބުތަކާއި އަލިފާނުގެ ބާވަތްތަކާއި އަދި އެކި ބާވަތުގެ އަލިފާން ނިއްވުމަށް ބޭނުންކުރަންޖެހޭ އާލާތްތަކާ ގުޅޭ މުހިންމު މައުލޫމާތުތައް ބައިވެރިންނާ ވަނީ ހިއްސާކޮށްފައެވެ. މީގެ އިތުރުން އަމަލީ ސެޝަންތަކުގައި އަލިފާން ނިއްވާ ފުޅި ފަދަ އާލާތްތައް ބޭނުންކުރާނެ ގޮތް ފަރިތަކޮށް ހާދިސާއެއްގެ ވަގުތުގައި އަވަސް ފިޔަވަޅުތައް އަޅާނެ ގޮތުގެ އަމަލީ ތަޖުރިބާ ވަނީ ފޯރުކޮށްދީފައެވެ.
މަސައްކަތުގެ މާހައުލުގެ ސަލާމަތާއި ރައްކާތެރިކަން ކަށަވަރުކުރުމަކީ އެ ކުންފުނިން ވަރަށް ބޮޑު އިސްކަމެއް ދޭ ކަމެކެވެ. އެގޮތުން ކުންފުނީގެ އެކި ޑިޕާޓްމަންޓްތަކުގެ މުވައްޒަފުންނަށް މިފަދަ ސަލާމަތީ ތަމްރީނުތައް ސިލްސިލާ ގޮތެއްގައި ކުރިއަށް ގެންދިއުމަށް މޯލްޑިވްސް ޕޯޓްސް ލިމިޓެޑުން އަންނަނީ މަސައްކަތް ކުރަމުންނެވެ. މިފަދަ ޕްރޮގްރާމްތަކުގެ ސަބަބުން ކުންފުނީގެ އެންމެހާ މުވައްޒަފުންނާއި މުދަލުގެ ރައްކާތެރިކަން އިތުރަށް ކަށަވަރުވެގެންދާނެއެވެ.
ކިޔުންތެރިންގެ ހިޔާލު