ދިވެހިރާއްޖޭގެ ޤައުމީ ދިފާޢީ ބާރުގައި ދިގު މުއްދަތަކަށް ޚިދުމަތްކުރެއްވި ސާޖަންޓް ފަސްޓް ކްލާސް ޙުސައިން ޢަބްދުއްރަޙުމާން ނިޔާވުމާ ގުޅިގެން، ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ، ޤައުމީ ދިފާޢީ ބާރުގައި މަސައްކަތްކުރައްވާ ސާޖަންޓް ފަސްޓް ކްލާސް ޙުސައިން ޢަބްދުއްރަޙުމާން ކުއްލި ގޮތަކަށް ނިޔަވި ޚަބަރު އެއްސެވީ ނުހަނު ފުންހިތާމައާއެކުގައި ކަމަށެވެ. މި ދަނޑިވަޅަކީ މުޅި ޤައުމީ ދިފާޢީ ބާރަށާއި އޭނާގެ ޢާއިލާއަށް ބޮޑު ހިތާމައެއް ލިބިގެންދިޔަ ވަގުތެއްކަން އެމަނިކުފާނު ފާހަގަކުރެއްވިއެވެ.
ސާޖަންޓް ފަސްޓް ކްލާސް ޙުސައިން ޢަބްދުއްރަޙުމާނަކީ ދިވެހިރާއްޖޭގެ ޤައުމީ ދިފާޢީ ބާރުގައި ވަރަށް އިޚުލާޞްތެރިކަމާއެކު ދިގު މުއްދަތެއްގައި ޚިދުމަތްކުރައްވާފައިވާ ބޭކަލެކެވެ. ރައީސުލްޖުމްހޫރިއްޔާގެ މެސެޖުގައި ފާހަގަކުރައްވާފައިވާ ގޮތުގައި، އޭނާ ވަނީ 21 އަހަރާއި 7 މަހާއި 16 ދުވަހު ދިވެހި އަސްކަރިއްޔާގައި އަގުހުރި ޚިދުމަތްތަކެއް ޤައުމަށްޓަކައި ކޮށްދެއްވާފައެވެ. އޭނާގެ ޚިދުމަތަކީ ސިފައިންގެ މުއައްސަސާއިން އަބަދުވެސް ހަނދާންކުރާނެ ޚިދުމަތްތަކެއް ކަމުގައި ވެސް ރައީސް ވިދާޅުވިއެވެ.
ހިތާމައިގެ މިދަނޑިވަޅުގައި، މަރުޙޫމްގެ ޢާއިލާއަށާއި ދިވެހިރާއްޖޭގެ ޤައުމީ ދިފާޢީ ބާރުގެ އެންމެހައި ސިފައިންނަށް ރައީސުލްޖުމްހޫރިއްޔާ ވަނީ އިޚުލާޞްތެރިކަމާއެކު ތަޢުޒިޔާ ދަންނަވާފައެވެ. އަދި الله އޭނާގެ ފުރާނައަށް ސުވަރުގޭގެ ދާއިމީ ނިޢުމަތް މިންވަރުކުރައްވައި ލޮބުވެތި ޢާއިލާއަށް ސާބިތުކަމާއި ކެތްތެރިކަން މިންވަރު ކޮށްދެއްވުން އެދި އެމަނިކުފާނު ވަނީ ދުޢާ ދަންނަވާފައެވެ.
ކިޔުންތެރިންގެ ހިޔާލު