ހުޅުމާލޭ ދެވަނަ ފިޔަވަހީގެ ހިޔާ ފްލެޓްތަކުގައި ދިރިއުޅޭ ރައްޔިތުންނަށް ދިމާވެފައިވާ ލިފްޓުގެ ދަތިކަން ހައްލުކުރުމަށް ސަރުކާރުން ފަށާފައިވާ މަޝްރޫއުގެ ދަށުން، ތިން ޓަވަރެއްގެ ލިފްޓުތަކުގެ މަސައްކަތް ނިންމައި ބޭނުންކުރަން ފަށައިފިއެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހާމަކޮށްފައިވާ ގޮތުގައި، މި ތިން ޓަވަރުގެ މަސައްކަތް ނިމުމާއެކު، ހިޔާ ސަރަހައްދުގެ 16 ޓަވަރުގެ ތެރެއިން 15 ޓަވަރެއްގައި އިތުރު ދެ ލިފްޓު ހަރުކުރުމުގެ މަސައްކަތް މިހާރު ވަނީ އެއްކޮށް ނިމިފައެވެ. މި މަޝްރޫއުގެ ތެރެއިން މިހާރު ބާކީ އޮތީ ހަމައެކަނި 16 ވަނަ ޓަވަރުގެ މަސައްކަތް ކަމަށް އެ ކޯޕަރޭޝަނުން ބުނެއެވެ.
ހިޔާ މަޝްރޫއުގެ ދަށުން 25 ފަންގިފިލާގެ 16 ޓަވަރު ބިނާކުރިއިރު، އެ ތަންތަނުގައި ކުރިން ހަރުކޮށްފައި ހުރީ ބަލިމީހުން އުފުލުމަށް ބޭނުންކުރާ ސްޓްރެޗާ އެރުވޭ ވަރުގެ ޖާގަ އޮތް ލިފްޓުތަކެއް ނޫނެވެ. މީގެ އިތުރުން، ޓަވަރުތަކުގައި އުޅޭ މީހުންގެ ނިސްބަތުން ލިފްޓު މަދުވުމުގެ ސަބަބުން ކޮންމެ ދުވަހަކުވެސް އާންމުންނަށް އަރައި ފޭބުމުގައި ބޮޑެތި ތަކްލީފުތަކަކާ ކުރިމަތިލާން ޖެހުނެވެ.
މި މައްސަލައަށް ދާއިމީ ހައްލެއް ހޯއްދަވައިދެއްވުމަކީ ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ރިޔާސީ ވައުދުފުޅެކެވެ. އެމަނިކުފާނުގެ ވައުދުފުޅާ އެއްގޮތަށް ކޮންމެ ޓަވަރެއްގައި އިތުރު ދެ ލިފްޓު ހަރުކުރުމުގެ މަސައްކަތް ހަވާލުކޮށްފައިވަނީ ޗައިނާގެ ޝެންޔެންގް ޔުއަންޑާ އިންޓެލެކްޗުއަލް އިންޑަސްޓްރީ ގްރޫޕް ކޯ ލިމިޓެޑާއެވެ.
މި މަޝްރޫއުގެ ދަށުން އަލަށް ހަރުކުރެވުނު ލިފްޓުތަކަކީ އެއްފަހަރާ 21 މީހުންނަށް ދަތުރުކުރެވޭ ވަރުގެ ޖާގަ ތަނަވަސް ލިފްޓުތަކެކެވެ. މީގެ އިތުރުން، މި ލިފްޓުތައް ފަރުމާކޮށްފައިވަނީ ބަލިމީހުން އުފުލުމަށް ސްޓްރެޗާވެސް ފަސޭހަކަމާއެކު އެރުވޭ ގޮތަށެވެ.
އެޗްޑީސީން އިތުރަށް ބުނެފައިވަނީ، މިހާރު މަސައްކަތް ކުރިއަށްދާ 16 ވަނަ ޓަވަރުގެ މަސައްކަތްވެސް ވީހާވެސް އަވަހަކަށް ނިންމައި، އާންމުންނަށް ހުޅުވާލުމަކީ އެ ކޯޕަރޭޝަންގެ އެންމެ ބޮޑު އެއް އަމާޒު ކަމަށެވެ. މި މަޝްރޫއު އެއްކޮށް ނިމުމުން ހިޔާ ފްލެޓްތަކުގައި ދިރިއުޅޭ އެތައް ހާސް ރައްޔިތުންނަކަށް ލިފްޓަށް އިންތިޒާރު ކުރަންޖެހޭ ވަގުތު ކުޑަވެ، ދިރިއުޅުމަށް ބޮޑު ލުޔެއް ލިބިގެންދާނެއެވެ.
ކިޔުންތެރިންގެ ހިޔާލު