އީރާނާއެކު އާދީއްތަ ދުވަހު އެއްބަސްވުމުގައި ސޮއި ކުރެވޭނޭ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.
ޓްރަމްޕް މިކަން ހާމަކޮށްފައިވަނީ އޭނާގެ އަމިއްލަ ޓުރުތު ސޯޝަލްގައި ޕޯސްޓްކުރި މެސެޖެއްގައެވެ.
އެމެރިކާގެ ރައީސް ބުނީ، އެއްބަސްވުމުގައި ސޮއި ކުރުމާއެކު ހޮރްމޫޒު ކަނޑުއޮޅި އެންމެނަށް ހުޅުވާލެވިގެންދާނެ ކަމަށެވެ.
ހޮރްމޫޒު ކަނޑުއޮޅި ހުޅުވިގެން ދާނެކަމަށް ބުނުން ފިޔަވައި، އީރާނާއެކު ހަދާ އެއްބަސްވުމުގައި ހިމެނޭ އިތުރު ކަމަކާ ގުޅޭގޮތުން އެމެރިކާގެ ރައީސް ޓްރަމްޕް ވަކި އެއްޗެއް ހާމަކޮށްފައެއް ނުވެއެވެ.
އިތުރަށް ހަމައެކަނި ބުނެފައިވަނީ “ކަންކަން ހަމަޔަކަށް އެޅުމުން” ފަހުގެ ތާރީޚެއްގައި އެމެރިކާއިން އީރާނަށް ދާނޭ ކަމަށާއި، އީރާނަށްގޮސް އީރާނުގައި ހުރި “ނިއުކްލިއަރ ޑަސްޓް” ހޯދައި، ޑައުންބްލެންޑްކޮށް އީރާނުގައި ނުވަތަ އެމެރިކާއަށް ގެންގޮސް ނައްތާލާނޭ ކަމަށެވެ.
އެއްބަސްވުމުގައި މާދަމާ ސޮއި ކުރެވޭނޭ ކަމަށް އެމެރިކާގެ ރައީސް ބުނިއިރު، ވާހަކަތަކުގައި މެދުވެރިއެއްގެ ދައުރު އަދާކުރާ ޕާކިސްތާނުގެ ބޮޑުވަޒީރު ޝަހްބާޒް ޝަރީފް މިއަދު ވިދާޅުވީ، ކުރިއަށްއޮތް 24 ގަޑިއިރުގެ ތެރޭގައި އެއްބަސްވުން ފައިނަލް ކުރެވޭނޭ ކަމަށް ބެލެވޭ ކަމަށެވެ. އެއްބަސްވުން ފައިނަލް ކުރެވުމާއެކު ވަގުތުން އިލެކްޓްރޯކް ސޮއި ކުރެވޭނޭ ކަމަށާއި، އެއްބަސްވުމާ ގުޅިގެން ބާއްވާ ޓެކްނިކަލް ވާހަކަތައް އަންނަ ހަފްތާގައި ފެށޭނޭ ކަމަށެވެ.
ކިޔުންތެރިންގެ ހިޔާލު