އެމެރިކާ ސިފައިން އީރާނަށް ވަރުގަދަ ވައިގެ ހަމަލާތަކެއް ދޭން ފަށައިފިއެވެ.
އެގޮތުން، މިހާތަނަށް އީރާނުގެ ދެކުނުގެ އެތައް ރަށަކަށް ތިން ބުރެއްގެ މަތިން މިސައިލް ހަމަލާތައް ދީފައިވާކަމަށް ރިޕޯޓްތައް ބުނެއެވެ.
އެމެރިކާ ސިފައިން ހަމަލާ ދެމުން ގެންދަނީ އީރާނުގެ ދެކުނުގެ ބަންދަރު އައްބާސްއާއި، ގޭޝްމް އައިލެންޑް، ސިރިކް، ޖަސްކަށެވެ. ހަމަލާތަކާއެކު ބާރުގަދަ ގޮވުންތައް ގޮވަމުންދާ ކަމަށް، އީރާނުގެ މީޑިއާއާއި ބައިނަލްއަގްވާމީ މީޑިއާ ވަސީލަތްތަކުންވެސް ބުނެއެވެ.
އެމެރިކާއިން ހަމަލާ ދެމުންގެންދަނީ އީރާނުގެ ރާޑަރު ސިސްޓަމްތަކަށާއި، ހޮރްމޫޒު އައްސޭރި ފަށަށް ވާގޮތަށް ތަންތަނުގައި ގާއިމްކޮށްފައިވާ މިސައިލް ނިޒާމުތަކަށާއި، ދިފާއީ ބެޓަރީތަކަށް ކަމަށްވެސް ޚަބަރުތައް ބުނެއެވެ.
ބަންދަރު އައްބާސްއަކީ އީރާނުގެ ކަނޑުގެ ލަޝްކަރު ގާއިމްވެފައި އޮންނަ ރަށެވެ.
މީގެއިތުރުން، ހަނގުރާމަ ފެށި ދުވަހު އެމެރިކާ ސިފައިން ބޮންއެޅި އީރާނުގެ މިނާބަށް އަނެއްކާވެސް ވަނީ ބޮން އަޅާފައެވެ.
އެމެރިކާ ސިފައިންވަނީ އީރާނުގެ ދެކުނުގެ ބައެއް އަވަށްތަކުގެ ފެނުގެ ނިޒާމުތަކަށްވެސް ބޮންއަޅައި ގޮއްވާލާފައެވެ. އޭގެ ސަބަބުން ދެ ސިޓީއަކަށް ބޯފެން ފޯރުކޮށްދިނުން ހުއްޓިފައިވާ ކަމަށް އެ ސަރަހައްދުގެ އޮފިޝަލުން ވިދާޅުވެއެވެ.
އެމެރިކާ ސިފައިން އީރާނަށް ހަމަލާދެމުން މިގެންދަނީ، ހޮރްމޫޒު ކަނޑުއޮޅި ސަރަހައްދުގައި އުދުހުނު އެމެރިކާގެ އަޕާޗީ ހެލްިކޮޕްޓަރެއް މިދިޔަ ހޯމަދުވަހު ވައްޓާލުމާ ގުޅިގެންނެވެ. އެ ހެލިކޮޕްޓަރު ވެއްޓުނީ އީރާނުން ހަމަލާ ދިނުމުގެ ސަބަބުން ކަމަށް އެމެރިކާއިން ބުނި ނަމަވެސް، އީރާނުން ވަނީ އެ ވާހަކަ ދޮގުކޮށްފައެވެ.
އަނެއްކޮޅުން، އެމެރިކާގެ ހަމަލާތަކުގެ ދިފާއުވުމަށް އީރާނުގެ އެއަރ ޑިފެންސް ނިޒާމުތަކުން މަސައްކަތް ކުރަމުން އެބަ ގެންދެއެވެ. އީރާނުގެ ބުޝެހްރް ޕްރޮވިންސް މަތިން އުދުހުނު އެމެރިކާގެ ޖާސޫސީ އަގުބޮޑު ޑްރޯންއެއްވެސް އީރާނުންވަނީ ވައްޓާލާފައެވެ.
އެމެރިކާއިން އީރާނަށް ދެމުންގެންދާ ހަމަލާތަކުގެ ރައްދު އަންނާނޭ ގޮތެއް ވަޒަންކޮށްލަންވެސް ނޭނގޭ ކަމަށް، މަސްރަހް ދިރާސާކުރާ ފަރާތްތަކުން ބުނެއެވެ.
ކިޔުންތެރިންގެ ހިޔާލު