2026 ވަނަ އަހަރު ބޭއްވުމަށް ހަމަޖެހިފައިވާ ފީފާ ވޯލްޑް ކަޕް ފުޓްބޯޅަ މުބާރާތުގެ ފޯރި މުޅި ރާއްޖެއަށް ގެނެސްދިނުމަށްޓަކައި، ޕަބްލިކް ސާވިސް މީޑިއާ (ޕީއެސްއެމް) އިން ކުރިއަށްގެންދާ ކަވަރޭޖްގެ ކޯ-ސްޕޮންސަރަކަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ހަމަޖައްސައިފިއެވެ.
މިކަމަށްޓަކައި ބޭއްވި ޚާއްޞަ ރަސްމިއްޔާތެއްގައި އެމްޕީއެލްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ އިސްވެރިންނެވެ. މި އެއްބަސްވުމުގެ ދަށުން، 2026 ވަނަ އަހަރު އެމެރިކާ، ކެނެޑާ އަދި މެކްސިކޯގައި ބޭއްވުމަށް ހަމަޖެހިފައިވާ ވޯލްޑް ކަޕްގެ މެޗުތައް ޕީއެސްއެމްގެ ޗެނަލްތައް މެދުވެރިކޮށް ރާއްޖޭގެ ހުރިހާ ސަރަޙައްދަކަށް ހިލޭ ބްރޯޑްކާސްޓް ކުރުމަށް ކުރާ މަސައްކަތުގައި އެމްޕީއެލް އިން ބޮޑު އެހީތެރިކަމެއް ފޯރުކޮށްދޭނެއެވެ.
ޕީއެސްއެމް އިން ބުނި ގޮތުގައި، ދުނިޔޭގެ އެންމެ ބޮޑު ކުޅިވަރު އީދު ދިވެހި ރައްޔިތުންނާ ހަމައަށް އެންމެ ފުރިހަމަ ގޮތުގައި ގެނެސްދިނުމަށް ސަރުކާރު ހިއްސާވާ ކުންފުނިތަކުން ދޭ އެއްބާރުލުމަކީ ލިބޭ ވަރަށް ބޮޑު ހިތްވަރެކެވެ. ޚާއްޞަކޮށް އެމްޕީއެލް ފަދަ ކުންފުންޏަކުން މި ފުރުޞަތުގައި ބައިވެރިވުމަކީ މުބާރާތުގެ ފޯރި ރާއްޖޭގައި އިތުރުވެގެންދާނެ ކަމެކެވެ.މި ކޯ-ސްޕޮންސަރޝިޕްގެ ދަށުން ވޯލްޑް ކަޕާ ގުޅޭ ތަފާތު ޕްރޮގްރާމްތަކާއި، މެޗުތަކުގެ ކުރިންނާއި ފަހުން ގެނެސްދޭ އެނަލިސިސްތަކުގައި އެމްޕީއެލްގެ ބައިވެރިވުން ފެނިގެންދާނެއެވެ.
އެމްޕީއެލް އިން ހާމަކޮށްފައިވާ ގޮތުގައި، އެ ކުންފުނިން އަބަދުވެސް މަސައްކަތް ކުރަނީ އިޖުތިމާޢީ ކަންކަމާއި، ޚާއްޞަކޮށް ދިވެހިންގެ މެދުގައި މަޤްބޫލު ކުޅިވަރުތައް ކުރިއެރުވުމަށް އެހީތެރިކަން ފޯރުކޮށްދިނުމަށެވެ.ފީފާ ވޯލްޑް ކަޕް 2026 ވެގެންދާނީ 48 ޓީމާއެކު ބާއްވާ ފުރަތަމަ މުބާރާތަށެވެ. މި މުބާރާތުގެ ހުރިހާ މެޗެއް ރާއްޖޭގެ އެކި ކަންކޮޅުތަކަށް ސާފުކޮށް ފެންނާނެ އިންތިޒާމް ހަމަޖެއްސުމަށް ޕީއެސްއެމް އިން ދަނީ ގިނަ މަސައްކަތްތަކެއް ކުރަމުންނެވެ.
ކިޔުންތެރިންގެ ހިޔާލު