ހޮރްމޫޒު ކަނޑުއޮޅީގެ ސަރަހައްދަށް ވެއްޓުނު އެމެރިކާ ސިފައިންގެ ހެލިކޮޕްޓަރުގެ ދެ ޕައިލެޓުން ކަނޑުމަތިން ސަލާމަތް ކޮށްފައިވާ ކަމަށް އެމެރިކާ ސެންޓްރަލް ކޮމާންޑުން ބުނެފިއެވެ.
ސެންޓްރަލް ކޮމާންޑުން ބުނެފައިވަނީ، ދެ ޕައިލެޓުންވެސް ތިބޭ ހެޔޮ ހާލުގައި ކަމަށެވެ. އެކަމަށް ދެގަޑިއިރު ހޭދަވި ކަމަށް ބުނެފައި ވެއެވެ.
އެކަމަކު، ޕައިލެޓުން ކަނޑުމަތިން ނެގި ގޮތުގެ އެއްވެސް ތަފްސީލެއް ހާމަކޮށްފައެއް ނުވެއެވެ.
އެމެރިކާ އަސްކަރިއްޔާގައި ބޭނުންކުރާ އޭއެޗް-64 އަޕާޗީ މަރުކާގެ ހެލިކޮޕްޓަރު ވެއްޓުނީ ހޮރްމޫ ކަނޑުއޮޅި ކައިރިން އުމާން ކަނޑުގައި އީރާނުގެ އުޅަނދުފަހަރަށް ފާރަލުމަށް ޕެޓްރޯލް ކުރަމުންދަނިކޮށް އިއްޔެއެވެ.
މި ޚަބަރާއެކު އެމެރިކާގެ ރައީސް ޑޮނަލްޑް ޓްރަމްޕް ބުނެފައިވަނީ، ހެލިކޮޕްޓަރު ވެއްޓުނު ނަމަވެސް، ދެ ޕައިލެންޓުން ސަލާމަތްވެފައިވާ ކަމަށެވެ.
ރިޕޯޓްތައް ބުނާގޮތުގައި ހެލިކޮޕްޓަރު ވެއްޓުމުގެކުރިން ދެ ޕައިލެޓުންވަނީ ކަނޑަށް ފުންމާލާފައެވެ.
ހެލިކޮޕްޓަރު ވެއްޓުނީ ކީއްވެގެން ކަމެއް އަދި ނޭނގެއެވެ. ހެލިކޮޕްޓަރު ވެއްޓުނީ ޓެކްނިކަލް މައްސަލައެއް ދިމާވެގެން ކަމެއް ނުވަތަ އީރާނުން ހަމަލާދީ ވައްޓާލީ ކަމެއް އަދި ބުނަން ނޭނގޭ ކަމަށް އެމެރިކާއިންވެސް ބުނެފައި ވެއެވެ.
ކިޔުންތެރިންގެ ހިޔާލު