ލުބުނާނުގެ ހިޒްބުﷲ ޖަމާއަތުގެ މުޖާހިދުން އިސްތިއުމާރީ އިސްރާއީލުގެ އުތުރަށް ވަރުގަދަ ވައިގެ ހަމަލާތަކެއް ދެމުން އެބަ ގެންދެއެވެ.
ހަމަލާތައް ދިނުމަށް މިސައިލާއި ރޮކެޓްވެސް ގެންދަނީ ބޭނުންކުރަމުންނެވެ.
އިސްތިއުމާރީ އިސްރާއީލުގެ އުތުރުގެ ރަށްތަކަށް ހިޒްބުﷲއިން މިއަދު ހެނދުނުން ފެށިގެން ގެންދަނީ ވައިގެ ހަމަލާތައް ދެމުންނެވެ.
ހިޒްބުﷲއިން މެދުނުކެނޑި ދެމުންގެންދާ ހަމަލާތަކާ ގުޅިގެން އިސްރާއީލުގެ އުތުރުން ނުރައްކަލުގެ ޑަނޑޫރާގެ އަޑުތައް ނުހުއްޓެވެ.
މިސައިލްތަކާއި ރޮކެޓްތައް ވައްޓަމުންދާ ކަމަށް އިސްތިއުމާރީ އަސްކަރިއްޔާއިން ބުނާއިރު، ގެއްލުމެއް ލިބުނު ކަމެއް ނުބުނެއެވެ.
ނަމަވެސް، އާންމުވަމުންދާ ވީޑިއޯތަކުން ފެންނަގޮތުގައި ހިޒްބުﷲގެ ހަމަލާތަކުގައި އިސްރާއީލުގެ އުތުރުގެ ރަށްތަކަށް ބޮޑެތި ގެއްލުންތައް ވަނީ ލިބިފައެވެ. ކިރްޔަތު ޝްމޯނާއަށްވެސް ބޮޑެތި ގެއްލުންތައް ލިބިފައި ވެއެވެ.
ލުބުނާނުގެ ހިޒްބުﷲއިން އިސްރާއީލުގެ އުތުރަށް ވަރުގަދަ ވައިގެ ހަމަލާތަކެއް ދެމުން މިގެންދަނީ، އިސްތިއުމާރީ ސިފައިން ލުބުނާނުގެ ދެކުނަށް ބޮންއަޅައި އެތައް ބަޔަކު މަރަމުން ގެންދިއުމާއި، އަދި ލުބުނާނުގެ ދެކުނުގެ އިތުރު ރަށްތައް ހިފުމަށް ކުރިއަށް ޖެހެމުންދާ ވަގުތެއްގައެވެ.
ހިޒްބުﷲއިން ގެންދަނީ ލުބުނާނުގެ ދެކުނަށް އަރައިގެންއުޅޭ އިސްތިއުމާރީ ސިފައިންނަށްވެސް ވަރުގަދަ ހަމަލާތަކެއްދީ، ދުޝްމަނުން މަރައި، އެމީހުންގެ ހަތިޔާރުތަކަށްވެސް ގެއްލުން ދެމުންނެވެ. އަދި ލުބުނާނުގެ އިތުރު ސަރަހައްދުތަކަށް ވަދެގަތުމަށް އުޅޭ އިސްތިއުމާރީ ސިފައިންނަށް ހަމަލާދީ ފަހަތަށްވެސް ޖައްސަމުން ގެންދެއެވެ.
ލުބުނާނުގެ ދެކުނުގެ ޒައުތަރުގައި އުޅުނު އިސްތިއުމާރީ ސިފައިންގެ އެތައް މަރްކަވާ ޓޭންކަކަށް ހިޒްބުﷲ މުޖާހިދުން ގައިޑެޑް މިސައިލުން ހަމަލާދީ މިއަދު ގޮއްވާލާފައި ވެއެވެ.
ލުބުނާނުގެ ދެކުނުގެ ދިބްއެއިންއަށް އެއްގަމުމަގުން ވަދެގަންނަން އުޅުނު އިސްތިއުމާރީ ސިފައިންނަށް ހަމަލާދީ ހުއްޓުވާފައި ވެސް ވެއެވެ.
އިސްތިއުމާރީ ސިފައިން އެންމެ ވަރުގަދައަށް ހަމަލާ ދެމުންގެންދަނީ ލުބުނާނުގެ ދެކުނުގެ ނަބާޓިއާ ހިފުމަށެވެ. އެ ރަށަކީ ލުބުނާނުގެ ދެކުނުގެ އިގްތިސާދުގެ އެންމެ މުހިންމު ރަށެވެ. އެރަށަށް އިސްތިއުމާރީ ސިފައިން ބޮންއަޅަމުން ގެންދާތާ އެތައް ދުވަހެއް ވެއްޖެއެވެ. އިސްތިއުމާރީ ސިފައިން މިހާރު ތިބީ ނަބާޓިއާގެ ރަށްބޭރުގައެވެ. އެމީހުންނަށް އެރަށް ނުހިފިގެން އުޅެނީ ހިޒްބުﷲގެ ރައްދު ހަމަލާތައް ވަރުގަދަ ކަމުންނެވެ.
ކިޔުންތެރިންގެ ހިޔާލު